25 июля 2009 г.
Çуллахи кунăн ырлăхĕ пысăк. Уй-хире тухсан тырă пуссисенче тăрисем чарăнма пĕлмесĕр юрлаççĕ. Вĕсем тырă акса ÿстерекене мухтаса хăйсен юррисене кĕвĕлеççĕ. Пĕр чарăнмасăр тăр-тăри! тăр-тăри! тесе юрлаççĕ. Çак кайăксем çĕр ĕçченĕ акана тухнине те, сухаланине те кураççĕ. Ахальтен мар ĕнтĕ вĕсен йăвисем тырă пуссисенче.
Мухтать, ырлать çĕр ĕçченĕсене тăри. Çÿле вĕçсе хăпарать те унтан ÿкнĕ пек çĕр çинелле анать. Çапла, вăйлă тыр-пул туса илес тесен çĕр ĕçченĕн нумай тар юхтармалла. Çакна ял ĕçченĕ лайăх ăнланать.
Иртнĕ кунсенче район пуçлăхĕ Геннадий Волков вырмана тухас умĕн уй-хирсене çитсе курчĕ. Çитсе курнипе кăна мар, тыр-пул мĕнле çитĕн-нипе тĕплĕн паллашрĕ. Ял хуçалăх предприятийĕсем кăçал «Ирень», «Московская-35», «Прохоровка», «Пирамида», «Приокская», «Землячка», «Тулайковская-10», «Свеча» ятлă çурхи тулă акса хăварнă. Çавăн пекех хуçалăхсем «Эльф», «Биос-1», «Скарлетт» урпа сорчĕсене те акнă. Геннадий Федорович чăн малтанах «Турхан», «Изамбаево» ял хуçалăх кооперативĕсен, «Сюрбеево» УАОн хирĕсене çитсе курчĕ. Пур çĕрте те тенĕ пекех акнă тырă хирĕсем сап-саррăн курăнаççĕ. Йĕри-тавра пăхатăн та — кăмăла каякан сăн ÿкерчĕк тухса тăрать. Тулли пучахлă хăмăлсем илемлĕн курăнса лараççĕ. Вăштăр-вăштăр çил вĕрнĕ май тинĕс хумĕ пек илемлĕн кассăн-кассăн хумханаççĕ. Çеçкене ларнă е тăкма пуçланă çĕр улмисем те чуна савăнтараççĕ. Тырă аван çитĕнтĕр тесе ĕçченсем им-çампа та тĕрĕс усă курни куç кĕретех. Çанталăк условийĕсем те хăратман вĕсене.
Малалла район пуçлăхĕн çулĕ «Дружба», «Труд» ял хуçалăх предприятийĕсен, «Слава картофелю» агрофирмăн хирĕсем урлă пулчĕ. Районта кăçал «Импала», «Невский», «Ред скарлетт», «Роко», «Романо», «Удача» тата ытти сортлă çĕрулми лартса хăварнă. Асăннă хуçалăхсен хирĕсенче пĕрчĕллĕ тата пăрçа йышши тырăсен пучахĕсем тулли, уйсем таса. Вĕсенче сиенлĕ хурт-кăпшанкăран, тĕрлĕрен чир-чĕртен вăхăтра имçамлани, удобрени сапни курăнать. Чылай çĕр лаптăкне кĕрхи тырă акма та хатĕрленĕ. «Рассвет» ял хуçалăх кооперативĕ — паянхи кун чи ăнăçлă ĕçлекен хуçалăхсенчен пĕри. Кăçалхи çул та вĕсем япăх мар тупăш илесси куçкĕретех. Район пуçлăхĕ унти хирсене те çитсе килме кăмăл турĕ. Пĕринче вĕсем нумай çул ÿсекен 6 культура çитĕнтереççĕ.
«Рассвет» хуçалăх специалисчĕсем паянхи кун ыйтăвне тивĕçтерекен техника çине пысăк тимлĕх уйăраççĕ.
Кĕçех тĕш-тырă пуçтарса кĕртмелли тапхăр пуçланать. Эпир пăхса çÿрерĕмĕр те, пур çĕрте те тĕш-тырă, çĕрулми, выльăх апачлĕх культурăсем лайăх çитĕнеççĕ. Вĕсене пăхса хакласан, районти хуçалăхсем япăх мар тухăç илме пултараççех. Çанталăкĕ çеç патăрччĕ. Çакна район пуçлăхĕ Г.Ф.Волков та палăртрĕ.
«Вырмана тухма районти пур ял хуçалăх предприятийĕ те хатĕр. Техникăна та вăхăтра юсаса тăраççĕ. Вырма вăхăтĕнче çанталăк çеç лайăх тăтăрччĕ. Мĕн çитĕннине вăхăтра пĕр тăкаксăр пуçтарса илме май пултăрччĕ», — терĕ Геннадий Федорович хирсене пăхса тухнă хыççăн.
Источник: "Каçал Ен"