15 июля 2009 г.
Питрав кунĕнче, Петрпа Павел апостолсен уявĕнче, Йÿç Шăхаль тата Юнтапа ялĕсенчи çамрăксем шкул картишĕнче пухăннă. Вĕсем икĕ команда çине пайланса вăйăсем вылянă, юрăсем юрланă, ташă картисенче çаврăннă. Куçсене хупласа чечек палласа илмелли вăйă пурне те килĕшнĕ. Чи интересли — волейболла выляни пулнă.
Кĕçĕнкаçалсемпе комсомольскисем те уяв ирттернĕ. Ăна С.И. Краснов купăсçă кĕвĕ каланипе уçнă. Культурăпа кану центрĕн ĕçченĕ Н.И.Жирнова пухăннисен умне тухса уяв историпе паллаштарнă. Кĕçĕнкаçалсем малалла Комсомольскине юрласа утнă. Уяври халăх хĕвел аничченех юрăсем шăрантарнă, пĕр-пĕрне тутлă апат-çимĕçпе сăйланă. Районти ытти ялсенче те уявсем иртнĕ. Халăх савăннă, юрланă-ташланă. Унта хутшăнакансем пурте кăмăллă юлнă