04 июля 2009 г.
Ăш-пиллĕ те тарават хĕрарăма ялта пурте хисеплеççĕ. «Мĕн тери маттур вăл, кашни çынпах калаçать, ăнлантарса парать. Пире те яланах пулăшма хатĕр. Телефон, газ, электроэнергишĕн хăйех тÿлесе килсе парать. Ватăсемшĕн çакă пушшех те меллĕ»,— тет ялти ветеран Людмила Федоровна Журавлева почтальонка пирки. Ял çыннисен кăмăлне туллин тивĕçтерме тăрăшать почтальон. Куллен ĕçе васкать. Ĕçтешĕсемпе тĕл пулса калаçать. Пуçланать вара ĕç кунĕ. Кунĕпех ура çинче Людмила Федоровна. Çĕнĕ Кипеçпе Тĕвенеш ялĕсенче пурăнакансене хаçат-журналпа тивĕçтерет. Ватăсене пенси укçи парать. Кашни кунах икĕ яла çаврăнса тухма тивет. Апла пулин те почтальон хăйĕн ĕçне чунтан юратать. Нихăçан та ÿпкелешсе калаçмасть.
Людмила Федоровна çак ялтах çуралса ÿснĕ, тăван шкулта ăс пухнă. Алла аттестат илнĕ хыççăн Волгоград тăрăхĕнче ĕçленĕ. 1979 çулта тăван ене таврăнса почтăна ĕçе вырнаçнă.1981—1983 çулсенче почта начальникĕнче вăй хунă. Унтан клуб заведующийĕнче те, магазинта та ĕçлеме тÿр килнĕ. Людмила Федоровнана шăпа 1990 çулта каялла почтах çавăрса килет.
«Почтальон ĕçне хамах суйласа илтĕм. Ĕç вырăнĕ пулчĕ те, вырнаçрăм. Пĕр вăхăт урăх çĕрте тăрăшрăм. Апла пулин те чуна çывăх ĕç хăй патнех туртрĕ. Çынсемпе курнăçса калаçма кăмăллă, вĕсен ыйтăвĕсене туллин тивĕçтерме тăрăшатăп. Халĕ, унчченхи пек, сумка хаçат-журналпа тулли мар çав. Ялта пурăнакансем темшĕн периодикăна сахал çырăнаççĕ. Паянхи куна, тĕслĕхрен, ытларах пенсионерсем хаçат-журнал илсе тăраççĕ. Çамрăксем темшĕн периодикăпа туслах мар. Ытларах телевизор кураççĕ пулас. Чи нумай хаçат-журнал çырăнакан çемьесене асăнас килет. Акă, Алевтина Смирнова, Евгений Михайлов, Василий Афанасьев эпĕ килессе чăтăмсăррăн кĕтеççĕ»,— тет почтальон ĕçĕпе паллаштарнă май.
Хирти Сĕнтĕр почта уйрăмĕн начальникĕ М.В.Петухова та Людмила Федоровна ĕçĕпе кăмăллă. «Шаннă ĕçе вăхăтра та пахалăхлă пурнăçлать. Хаçат-журнал çырăнтарас енĕпе те маттур вăл. Кашни уйăхрах плана тултарса пырать. Кун пек ĕçтешпе ĕçлеме те кăмăллă. Ÿсĕмсем те курăмлă. Тĕслĕхрен, паянхи куна хаçат-журнал çырăнтарас енĕпе эпир япăх мар ĕçлетпĕр. Кунта почтальонкăсен тăрăшулăхне палăртмаллах»,—тет Мария Варсанофьевна.
Людмила Федоровнапа Николай Семенович Журавлевсем виçĕ ача çитĕнтерсе пурнăç çулĕ çине кăларнă. Килĕштерсе пурăнаççĕ вĕсем. Картиш тулли выльăх-чĕрлĕх тытаççĕ, пахча-çимĕç çитĕнтереççĕ.
Источник: "Каçал Ен"