01 июля 2009 г.
Июлĕн 4-мĕшĕнче Комсомольски, Патăрьел тата Елчĕк районĕсен пĕрлехи Акатуй-Сабантуйĕ пулать. Ăна тĕп хуламăрти «Шупашкар — 500 çул» ятлă паркра ирттерме палăртнă. Çакна каласа хăвармалла: Комсомольски районĕ халиччен кунашкал мероприятие хутшăнман, кăçал пуçласа. Программа анлă та пуян пуласса шантарать «Кĕтне» ентешлĕхĕн председателĕ Валери Туркай: куракансене спорт ăмăртăвĕсем, художество пултарулăх коллективĕсен, эстрада юрăçисен концерчĕсем кĕтеççĕ.
Çамрăксем, спорта кăмăллакансем футбол, волейбол вăййисенче, кире пуканĕ йăтса, кĕрешсе хăйсен вăйне виçме пултараççĕ. Пирĕн район командисем, Шупашкарта пурăнакан ентешĕмĕрсем çак турнирсенче аван енчен çеç палăрасса шанас килет.
Район администрацийĕн культура пайĕн начальникĕ В.С.Васильев каланă тăрăх, Элпуç ял поселенийĕн тата «Мишар» эстрадăпа фольклор ансамблĕсен артисчĕсем Акатуя хутшăнакансене хăйсен пултарулăхĕпе савăнтарĕç.
Уяв Шупашкарти «Шупашкар — 500 çул» ятлă паркра 11 сехетре пуçланать. Кăмăл пуррисене унта çитсе курма сĕнетпĕр.
Источник: "Каçал Ен"