01 июля 2009 г.
Районти ял хуçалăх предприятийĕсен уйĕсенче ĕçсем малалла пыраççĕ. Çумкурăка, чир-чĕре, сиенлĕ хурт-кăпшанкăна хирĕç им-çамсем сапаççĕ. Июнĕн 29-мĕшĕ тĕлне çумкурăкпа кĕрешсе 13752 гектар пĕрчĕллĕ тата пăрçа йышши тырăсен, 1571 гектар çĕрулми уйĕсенче ĕçсем туса ирттернĕ. Нумай çул ÿсекен курăксем пурĕ районти пĕрлешÿллĕ хуçалăхсенче 5162 гектар йышăнаççĕ. Вĕсенчен 3883 гектарне пуçтарса илнĕ. Пĕтĕмĕшле илсен курăксене пĕрремĕш хутне çулса пĕтернĕпе пĕрех. Вăрлăх туса илмелли тата выльăхсене ешĕл апат валли çулмалли лаптăксем çеç юлнă.
Хуçалăхсем пикенсех выльăх апачĕ хатĕрлеççĕ. Çÿлерех асăннă кун тĕлне 4486 тонна утă пур. «Урожай» колхоз 623 тонна, «Труд» ял хуçалăх кооперативĕ 500 тонна, «Госсорткомиссия» патшалăх учрежденийĕ 380 тонна çак паха апата янтăланă.
Сенаж хывас ĕç те хĕрÿ пырать. Ăна пурĕ 5853 тонна хатĕрленĕ. Ку енĕпе «Урожай» колхоз (1200 тонна), «Луч» (1087 тонна), «Рассвет» ял хуçалăх кооперативĕ (900 тонна) ăнăçлă ĕçлеççĕ.
Ĕçсем малалла пыраççĕ. Выльăх кăшманĕн тата ытти культурăсен уйĕсенче те агротехника ĕçĕсем тăваççĕ.
Источник: "Каçал Ен"