11 июня 2009 г.
Пирĕн районта нумай хваттерлĕ 191 çурт шутланать (кунта 2 хваттерлисем те кĕреççĕ). Çав шутран 145-шĕ район центрĕнче вырнаçнă. Республикăри «Чăваш Республикин территорийĕнче вырнаçнă нумай хваттерлĕ çуртсене тĕпрен юсасси» Программăпа килĕшÿллĕн, кăçал Комсомольски ялĕнчи 13 çурта тĕпрен юсама палăртнă. Вĕсем Заводская, Советская, Куйбышев урамĕсенче, К.Антонов микрорайонĕнче вырнаçнă. Çак тĕллевпе пурăнмалли çуртсемпе коммуналлă хуçалăха аталантармалли фондран 16142 пин тенкĕ, республикăри, вырăнти бюджетсенчен укçа-тенкĕ уйăраççĕ. Çурт хуçисен те кăштах тăкакланма тивет, вĕсем пĕтĕм тăкаксен 5 процентне саплаштараççĕ. Нумай хваттерлĕ çуртсен çивиттисене улăштарнă ĕнтĕ. Унта Комсомольскинчи юсавпа строительство участокĕн тата «Стройсервис» предприятин рабочийĕсем вăй хучĕç. Кунсăр пуçне, инженери коммуникацийĕсене улăштарма, фасадсене юсама палăртнă.
Патшалăх, район администрацийĕ хăйсем çине илнĕ ĕçе пурнăçлаççĕ-ха. Анчах, управляющи компанирен пĕлтернĕ тăрăх, нумай хваттерлĕ çуртсенче пурăнакансем хăйсен тÿпине хывма васкамаççĕ имĕш. Каплах пулсан, ĕçсен хăвăртлăхĕ чакма пултарать. Çуртсен сăн-сăпачĕ илемлентĕр тесен тăкакланмасăр пулмасть ĕнтĕ.
Источник: "Каçал Ен"