06 июня 2009 г.
Июнĕн 2-мĕшĕнче Шупашкарти Çеçпĕл кинотеатрта Пĕтĕм тĕнчери кинофестивале савăнăçлă лару-тăрура уçнă. Вăл июнĕн 6-мĕшĕччен пычĕ. Республика çыннисем çак тапхăрта 82 картина пăхнă, вĕсене ÿкерекен артистсемпе тĕл пулнă. Унăн ĕçне çĕршывĕпех паллă çынсем хутшăннă. Раççей халăх артисчĕсем Ирина Скобцева, Юрий Чернов, Родион Нахапетов, Виктор Бычков, документлă фильмсен конкурсĕн жюри председателĕ Алла Гербер, Елена Стишова кинокритик, Юрий Грымовпа Алексей Герман-кĕçĕнни, Александр Хван, Светлана Дружинина, Алексей Мукасей кинооператор тата ыттисем те килсе çитнĕ. Вĕсем тĕрлĕ мероприятисем йĕркеленĕ. П.П.Хусанкай ячĕллĕ, «Салют», трактор тăвакансен, «Акаци» культура керменĕсем, «Атăл», «Мир Луксор», «Çеçпĕл» кинотеатрсем, «Чăваш Республикин Наци библиотеки, Чăваш Республикин патшалăх электрон тата кинодокументаци архивĕн кинозалĕ куракансене йышăннă.
Фестиваль паян хупăнать.
Источник: "Каçал Ен"