03 июня 2009 г.
Июнĕн 1-мĕшĕнче районти санитарипе эпидемиологи комиссийĕн черетлĕ ларăвĕ иртрĕ. Унта хутшăннисем икĕ ыйту пăхса тухрĕç. «Ял территорийĕсенчи тирпейлĕх тата производствăри, йăлари каяшсене пуçтарнă, турттарнă, тĕп тунă чухне санитари законодательствине епле пурнăçлани пирки» ыйту районти кашни çыннах пырса тивет. Пуçтарăннă çÿп-çапа тирпейлесси хальлĕхе кирлĕ шайра тесе калаймăн. Ялсенче те, район центрĕнче те. Акă, Комсомольски ялĕн свалки тавра тахçантанпах калаçу пырать ĕнтĕ. Вăл тулса ларнă, чавман вырăн та юлман, тахçанах çĕнни тума вăхăт. Çавăнпа вăл тĕрлĕ-тĕрлĕ требованисене тивĕçтермест. Çакăн пирки «Водоканал» предприяти директорĕ Сергей Макаров пăшăрханса каласа пачĕ. Пирвай çĕнĕ свалка валли çĕр вырăнĕ суйласа илмелле. Район администрацийĕ, капиталлă строительство пайĕ сĕнекен вырăнсене пĕри те тепри хирĕçлеççĕ, ун вырăнне вара пĕр-пĕр çĕре кăтартакан никам та çук. Çÿп-çап упрамалли полигонăн проектне тума çеç, капиталлă строительство пайĕн специалисчĕ А.Краснов каланă тăрăх, 1 миллион тенкĕ кирлĕ, ăна районăн кăçалхи бюджетĕнче хывса хăварнă. Çак ĕçе пĕтĕмпе вĕçлеме вара сахалтан та çулталăк тата 5 миллион тенкĕрен кая мар укçа кирлĕ. Апла пулсан, «Водоканалăн» тĕрĕслекен тĕрлĕ органсем паракан штрафсене пĕрре мар тÿлемелле пулĕ-ха...
Ялсенче çак енĕпе мĕнле лару-тăру пулнипе Асанкасси, Комсомольски, Хирти Сĕнтĕр, Элпуç, Шурут ял поселенийĕсен пуçлăхĕсем Н.Карпов, П.Силивестров, Г.Ефремов, Н.Носов тата А.Алексеев паллаштарчĕç. Вĕсем çÿп-çаппа, ирĕк паман çĕрте туса хунă свалкăсемпе епле кĕрешни пирки каласа пачĕç. Çынсене темиçе те асăрхаттарнине асăнчĕç. Георгий Киргизов вара сăмахпа калани çителĕксĕррине, йĕркене пăсакансем çине протокол çырмаллине асилтерчĕ. «Административлă комиссие 8 çул ертсе пыратăп, çак хушăра ял поселенийĕсенчен пĕр протокол та килмен. Пĕрне штраф парсан кÿрши тирпейлетех», — терĕ Георгий Михайлович. Тĕрĕсех çак шухăш, хăш-пĕрисем урăхла ăнланмаççĕ е ăнланасшăн мар.
Тĕнчери 44 çĕршывра сысна грипĕ текен чир сарăлнă. Халлĕхе Раççейре çак амакпа чирленĕ 3 çынна шута илнĕ. «Районта А(H1N1) вируслă грипп чирĕнчен сыхланма мерăсем йышăнни пирки» ыйтупа район больницин тĕп врачĕ Маргарита Федорова тата Надежда Михайлова инфекционист калаçрĕç. Асăннă чир килсе ерсен хака ларма пултарать. Унран сыватас тесен хаклă медикаментсем туянмалла. Çак вируспа кĕрешме пулăшакан ятарлă вакцинăна вара октябрь уйăхĕнче кăларма шантараççĕ.
Районти ветеринари станцийĕн тĕп врачĕн çумĕ Энвер Ильязов ял хуçалăх предприятийĕсенчи, уйрăм хуçалăхсенчи сыснасене пурне те шута илнине, чир ересрен мероприятисен планне хатĕрленине каларĕ. Паянхи куна районти пĕрлешÿллĕ хуçалăхсенче 5904, килсенче 3965 пуç тытаççĕ çак выльăха. Сысна какайне тата унран тунă продукцие район территорине кÿрсе килессине е илсе тухса каяссине тĕрĕслеме пуçланине палăртрĕ.
Лару ĕçне Г.Киргизовпа Роспотребнадзорăн Чăваш Республикинчи управленийĕн Патăрьелĕнчи территориллĕ уйрăмĕн начальникĕн çумĕ А.Прохоров пĕтĕмлетрĕç. Сÿтсе явнă ыйтусемпе комисси членĕсем çывăх вăхăтра пурнăçламалли ĕçсем пирки йышăну турĕç.
Источник: "Каçал Ен"