03 июня 2009 г.
Июнĕн 1-мĕшĕнче — Пĕтĕм тĕнчери ачасене хÿтĕлемелли кун — районти культурăпа кану центрĕн тата районти ачасен тĕп библиотекин ĕçченĕсем савăнăçлă мероприяти йĕркелерĕç. Палăртнă вăхăта районти культурăпа кану центрĕн çурчĕ умне Комсомольски 1-мĕш вăтам шкулĕн кану лагерьне çÿрекен ачасем, ушкăнсен воспитателĕсем, вожатăйсем пухăнчĕç. Уяв программине Нина Полякова ертсе пычĕ. Хаваслă кулă пулчĕ ачасен сăн-питĕнче. Кăмăлтан юрларĕç, ташларĕç шăпăрлансем... Çĕртме уйăхĕн пĕрремĕш кунĕ вăл — çуллахи каникул пуçланни те, çу тапхăрĕн пĕрремĕш кунĕ те.
Ачасен тĕп библиотекин ертÿçи Г.Зайнуллина тĕрлĕ вăйăсем йĕркелерĕ. Шĕвĕрккесем хăйсен пултарулăхĕпе ăсталăхне кăтартрĕç. Чи маттуррисем парнесене тивĕçрĕç.
Пуçтарăннисене саламлама РФ Перекет банкĕн Патăрьелĕнчи 4440 номерлĕ уйрăмĕн Комсомольскинчи 4440Ÿ024 номерлĕ хушма офисĕн заведующийĕ Е.С.Кополухина та килсе çитрĕ. Вăл майăн 25-мĕшĕнчен пуçласа июнĕн 7-мĕшĕччен Раççейри Перекет банкĕ «Создаем детский капитал!» акци ирттерни пирки пĕлтерчĕ, ачасене пылак çимĕçпе хăналарĕ.
Кăнтăрла иртсен ачасем районти тĕп бибиотека умне пухăнчĕç. Унта «Краски детства» ятпа конкурс иртрĕ. Асфальт çинче ачасем тĕрлĕ тĕслĕ пурăпа ÿкерчĕксем турĕç. Çĕнтерÿçĕсене парнесем парса хавхалантарчĕç. Парнисене илме М.Г. Камалюков, О.Н.Воробьев, Е.В.Ананьева, Н.А.Самарин предпринимательсем спонсорла пулăшу панă.
Источник: "Каçал Ен"