27 мая 2009 г.
Кăçал пирĕн республикăра тăххăрмĕш классенчен 11673 ача вĕренсе тухать. Çав шутран вун виççĕшĕ кĕçех Хырхĕрри тĕп шкулĕпе сыв пуллашĕ.
Юлашки шăнкăрав уявĕ савăнăçлă лару-тăрура пуçланчĕ, илемлĕ юрă-кĕвĕ, куçа илĕртекен чечек çыххисем, шкул тумĕ тăхăннă чипер хĕрсемпе костюмлă патвар каччăсем, вĕсен ашшĕ-амăшĕ… Чи малтанах выпускниксене саламласа шкул директорĕ Ю.П.Алексеев, Хырхĕрри ял поселенийĕн пуçлăхĕ А.Н.Воробьев, район администрацийĕн вĕрентÿ пайĕн методисчĕ Н.М.Тимофеева тухса калаçрĕç. Тăххăрмĕшсен пĕр-ремĕш учителĕсем Г.В.Храмовăпа А.П.Хлебникова сăмахĕсене вара чылайăшĕ хумханса итлерĕ.
Тăван шкул ытамĕнче тăхăр çул хушшинче ачасем ÿсрĕç, тĕрекленчĕç, анлă тавра курăмлă çамрăксем пулса тăчĕç. Аслисем вĕрентнипе утăм хыççăн утăм туса йывăрлăхсене çĕнтерсе пыма хăнăхрĕç. Саша Белков, Сергей Пожеданов, Юля Ершова, Валя Никифорова, Ирина Шикова районти спорт ăмăртăвĕсенче яланах малтисен ретĕнче пулчĕç. Дима Ятманов географи, Саша Белков историпе обществоведени, Люда Ершова чăваш чĕлхипе литератури предмечĕсемпе иртнĕ олимпиадăсен призерĕсем. Çак пултаруллă çамрăксене уяв вăхă-тĕнче Хисеп грамотисемпе чысларĕç. Шкулти, районти пур мероприятие активлă хутшăннă Миша Топтыгин, Наташа Хлебникова та ырă сăмахсене тивĕçрĕç.
Пĕрремĕш класра пĕлÿ пухакансем аслă юлташĕсене ăмсанса та тĕсесе сăнарĕç. Хăйсен сăввисенче вĕсем пекех пултаруллă пулма шантарчĕç. Асăнмалăх илемлĕ открыткăсем парнелерĕç. Юратнă тĕпренчĕкĕсене саламлама ашшĕ-амăшĕ чылайăн пуçтарăннă. В.В.Шикова, Н.И.Ершова ачасене экзаменсене ăнăçлă тытма, пурнăçра лайăх çынсем пулма ырă сунчĕç.
Юлашки шăнкăрава пĕрремĕш класс хĕр ачи Люба Михеевăпа Саша Белков выпускник янраттарчĕç. Ун сасси пĕрре савăнтарчĕ, тепре хурлантарчĕ…
Источник: "Каçал Ен"