23 мая 2009 г.
Районта апрелĕн 8-мĕшĕнчен пуçласа майăн 15-мĕшĕччен шкул çулне çитмен ачасен учрежденийĕсенче тата шкул çумĕнчи кĕске вăхăтлăх ушкăнсенче «Малышиада» сывлăхпа спорт ăмăртăвĕсем иртрĕç. Ăна сывă пурнăç йĕркине аталантарма пулăшас, вăй-хал тата ăс-хакăл аталанăвĕ енчен пултаруллисене тупса палăртас тата ытти енĕпе те йĕркеленĕ. Вăл 2 тапхăрпа иртнĕ. Унта шкул çулне çитменнисен 6 учрежденийĕ тата шкулсенчи кĕске вăхăтлăх 8 ушкăн хутшăнчĕ. Вăйăсенче шăпăрлансем 30 метрлă дистанцие чупрĕç, тăршшĕне сикрĕç, скакалкăпа упражненисем турĕç, ташă хусканăвĕсене, ритмика гимнастикине кăтартрĕç, мечĕке 10 метр тăршшĕне хăваласа пычĕç.
Çĕнтерÿçĕсене палăртса хăварар-ха. Хăвăрт чупассипе Д.Давыдова (Хирти Явăшри «Колобок» ача сачĕ) — пĕрремĕш, Э.Хамидуллина (Урмаелĕнчи («Лейсан» ача сачĕ) — иккĕмĕш, Л.Юманова (Комсомольскинчи «Рябинушка» ача сачĕ), А.Осиповăпа Я.Осипова (Анат Тимĕрчкасси тĕп шкулĕ çумĕнчи кĕске вăхăтлăх ушкăн) виççĕмĕш вырăнсем йышăнчĕç. Арçын ачасем хушшинче ку енĕпе Ю.Яковлев («Колобок»), В.Захаров (Тăманлă Выçли вăтам шкулĕ çумĕнчи кĕске вăхăтлăх ушкăн), Ж.Шашкин («Рябинушка»), Н.Адиев («Лейсан») палăрчĕç. Вĕсем 1—3-мĕш вырăнсене алăран вĕçертмерĕç.
Чупса пырса тăршшĕне сикес енĕпе Э.Хамидуллина («Лейсан»), Я.Осипова (Анат Тимĕрчкасси тĕп шкулĕ çумĕнчи кĕске вăхăтлăх ушкăн), Д.Горбунова («Рябинушка») çĕнтерÿçĕсем пулса тăчĕç. Çавăн пекех ку енĕпе М.Гусева (Комсомольскинчи «Колосок»), И.Шакуров («Лейсан»), Ж.Шашкин («Рябинушка») чи лайăх кăтартусем турĕç.
Ачасене Э.Н.Смирнова («Колобок»), И.М.Камальтдинова («Лейсан»), А.В.Сергеева («Рябинушка»), Т.В.Плешкова (Анат Тимĕрчкасси тĕп шкулĕ), О.М. Шингалова (Тăманлă Выçли вăтам шкулĕ), С.В.Лещева («Рябинушка») воспитательницăсем хатĕрленĕ.
«Малышиада» вăйăра çĕнтернĕ ачасене Хисеп грамотисемпе чысланă, хутшăннисене сертификатсем панă.
Кун пек мероприятисем ирттерни ачасене аталанма пулăшать, вăй-халне ÿстерме хавхалантарать.
Источник: "Каçал Ен"