23 мая 2009 г.
Çын сывлăхлă пулни çĕршывшăн пĕлтерĕшлине кашниех çав тери лайăх пĕлет. Çавăн пекех вăл хамăршăн та пысăк пуянлăх пулса тăрать-çке. Çирĕп сывлăхлă çын телейлĕ. Вăл ирсерен вăрансан çĕнĕ кун пуçланнăшăн савăнать. Анчах та сывлăхĕшĕн тăрăшманнисем, хăйсене упрама пĕлменнисем те пур-ха. Акă, Раççей Федерацийĕн следстви комитечĕн Чăваш Республикинчи следстви управленийĕн Патăрьелĕнчи районсем хушшинчи следстви уйрăмĕ кăçалхи иккĕмĕш кварталăн пĕрремĕш çурринче (апрель — май) Комсомольски районĕнче тĕрлĕ сăлтавпа вилнĕ çынсем пирки 13 материал пă-хса тухрĕ. Вăл шутран 10 çын апрельте, 3-шĕ май уйăхĕнче çут тĕнчерен уйрăлнă. Тĕрĕслев çакна кăтартса пачĕ: 13 çынран 4-шĕ алкоголь продукцийĕпе наркăмăшланнă, пĕрин пурнăçĕ сĕрĕм тивнипе татăлнă, ыттисем вара чире пула çĕре кĕнĕ. Çын пурнăçĕ вăхăтсăр татăлнипе çыхăннă материалсем пĕри те Раççей Федерацийĕн Уголовлă Кодексĕн 105 статйин 1-мĕш пайĕпе тата 111 статйин 4-мĕш пайĕпе çыхăнса тăмаççĕ. Урăхла каласан, вĕсем уголовлă ĕç пуçарма хистемеççĕ.
Источник: "Каçал Ен"