18 апреля 2009 г.
Ял çыннисене пăшăрхантаракан ыйту чăннипех те нумай. Пĕри ĕç укçипе, тепри ял хуçалăх продукцийĕсем, уйрăмах сĕт йÿнĕ пулнипе — кăмăлсăр. Ялта пурăнакансен тупăшĕ те çĕр çинче ĕçленинчен нумай килет. Çак вун-вун ыйтăва татса парас, çĕнĕлĕхсемпе паллаштарас тесе районта кашни уйăхрах информаци кунĕ иртет. Шупашкар хулинче тĕрлĕ министерствăра, ведомствăра ĕçлекенсем тĕл пулăва килеççĕ. Акă, апрелĕн 15-мĕшĕнче районта черетлĕ информаци кунĕ иртрĕ. Ĕçлĕ ушкăнсем тăватă ял поселенийĕн пурнăçĕпе туллин паллашрĕç, унти ĕçченсемпе тĕл пулчĕç.
«Чувашреспроф» пĕрлешĕвĕн пай пуçлăхĕ В.П.Ильин, агропромышленноçра ĕçлекенсен районти профсоюз организацийĕн председателĕ Ю.С.Тимофеев, ял хуçалăх пайĕн начальникĕ Г.М.Киргизов Хирти Сĕнтĕр ял поселенийĕнче пулчĕç. Чи малтанах ĕçлĕ ушкăн Çĕнĕ Кипеçри сĕт-çу завочĕпе паллашрĕ. Вăл — районта паянхи кун чи ăнăçлă та тупăшлă ĕçлекен предприятисенчен пĕри. Унăн пуçлăхĕ В.С.Агамирян завод ĕçĕ-хĕлĕпе туллин паллаштарчĕ: «Эпир ĕçе пикеннĕренпе 10 çул çитрĕ. Çак вăхăтра аталанма, вăй илме пултартăмăр. Тĕслĕхрен, паянхи куна заводра 50 çын вăй хурать, вĕсене ĕç укçипе вăхăтра тивĕçтеретпĕр. 9 тĕрлĕ продукци кăларатпăр». Кунта ял çыннисене ĕçлеме пĕтĕм услови пур. Çитес вăхăтрах çĕнĕ столовăя хута яраççĕ. Специалистсем ĕçченсемпе тĕл пулчĕç, ыйтусем çине хуравларĕç. В.П.Ильин ялта çакăн пек завод ĕçленипе кăмăллă юлчĕ. Мĕншĕн тесессĕн ял çыннисем валли пур çĕрте те кун пек ĕç çук. «Паянхи куна Чăваш Республикинче 22,3 пин çын ĕçсĕр. Вĕсене пулăшас тĕллевпе РФ Правительстви çине тăрса ĕçлет. Ятарлă программа йышăннă. Унпа килĕшÿллĕн Чăваш Республики валли 526 миллион тенкĕ уйăрнă, вĕсене ĕçе кĕртме тытăннă та»,— терĕ вăл.
Нĕркеçри вăтам шкулта та пулчĕ ĕçлĕ ушкăн. Учительсем чылай ыйту пачĕç. Ял хуçалăх продукцийĕсем ытла та йÿнĕ пулнипе кăмăлсăр вĕсем. Ку енĕпе вара çирĕп йышăнусем кирлех тесе шутлаççĕ. Хирти Сĕнтĕр ял поселенийĕн пуçлăхĕ Г.Е.Ефремов территоринчи çĕнĕлĕхсемпе, улшăнусемпе, малашнехи плансемпе паллаштарчĕ. Ĕçлĕ ушкăн çураки пирки те сăмах хускатрĕ. «Пĕтĕмĕшле илес пулсассăн, районти пур хуçалăх та çураки ирттерме хатĕр. Удобрени, çунтармалли-сĕрмелли хатĕрсем çителĕклĕ туяннă. Машинăсемпе тракторсене, ытти техникăна юсанă»,— терĕ Г.М.Киргизов.
Район пуçлăхĕ Г.Ф.Волков, ЧР шалти ĕçсен министрĕн çумĕ С.Н.Белоусов Чĕчкен ял поселенийĕнче, районти шалти ĕçсен пайĕнче пулчĕç. Унти ĕçченсемпе тĕл пулу йĕркелерĕç, информаци кунĕн тĕп темисене сÿтсе яврĕç.
Физкультурăпа спорт тата туризм министрĕн çумĕ С.В.Мельников, «Чувашия» ИК пай пуçлăхĕ В.И.Андреев Александровка, Комсомольски ял поселенийĕсене çитсе курчĕç, шкул коллективĕпе тĕл пулчĕç.
Информаци кунне район пуçлăхĕн пÿлĕмĕнче пĕтĕмлетрĕç.
Ĕçлĕ ушкăн ял çыннисене йышăнма та май тупрĕ. Вĕсен ыйтăвĕсем çине хуравларĕ.
Источник: "Каçал Ен"