15 апреля 2009 г.
Районти ĕç тăвакан уголовлă инспекцин ĕçĕ-хĕлĕ тĕрлĕ енлĕ. Тăтăшах рейда тухмалла, судпа айăпланнисемпе тĕл пулмалла, профилактика мероприятийĕсем йĕркелемелле. Суд тенкелĕ çине ларнă граждансене тĕрĕс çул çине тăма пулăшасси те кунта ĕçлекенсен тивĕçĕ. С.А.Горячкин начальникпа В.Х.Денисов инспектор хăйсен ĕçне лайăх пĕлеççĕ, пахалăхлă пурнăçлаççĕ. Тĕслĕхрен, кăçалхи пĕрремĕш кварталти кăтартусемпе Чăваш Республикин ĕç тăвакан уголовлă 25 инспекци хушшинче вĕсем пиллĕкмĕш вырăнта. Кăçал судпа айăпланнă 16 çынна учетран кăларнă, 13 гражданина шута илнĕ. Суд саккунĕсене пăхăнман 4 çынна ирĕк прависĕр хăварнă. Виçĕ гражданин айăплава пăхăнманни пирки юсанмалли вăхăта тăсма тивнĕ. Хăйсене лайăх енчен тытакансене, вĕсем пиллĕкĕн, айăплавран хăтарнă. «Суд тенкелĕ çине ларнисем хушшинче тĕрĕс çул çине тăрас тĕллевлисем те, саккуна çапла сĕмсĕррĕн пăсакансем те пур. Кашнинпе уйрăммăн калаçмалла, ĕçпе тивĕçтермелле, профилактика мероприятийĕсем те йĕркелемелле»,— тет Сергей Александрович.
С.А.Горячкин хăйне шаннă ĕçе кирлĕ пек пурнăçлать. Çавăн пекех опытне ÿстерсе пырать. Акă, нумаях пулмасть вăл «Чи лайăх УИН сотрудникĕ» конкурса хутшăннă. Чăваш Республикинчи маттур та пултаруллă сакăр ĕçченпе вăй виçме тивнĕ унăн. «Сотрудниксене тĕрлĕ енлĕн тĕрĕслерĕç. Кунта пĕрремĕш медицина пулăшăвĕ парассине те, пăшалтан перессине те, РФ саккунĕсене пĕлнине те, физкультура упражненийĕсем тунине те шута илчĕç. Жюри членĕсем çирĕп тĕрĕслерĕç. Заданисене тĕплĕн, хăвăртрах пурнăçларăм. Пĕрремĕш вырăна çĕнсе илме пултартăм»,— тет Сергей Александрович конкурс пирки.
Чăваш Республикинчи «Чи лайăх УИН сотрудникĕн» — С.А.Горячкинăн, çитес вăхăтрах Тула хулинче иртекен Раççей шайĕнчи конкурса хутшăнмалла. Унта та вăл çĕнтерĕве алран вĕçертмессе шанатпăр. Çак конкурса кăçал майăн 7-мĕшĕнче Раççейри ĕç тăвакан уголовлă инспекци 90 çул тултарнине халаллаççĕ.
Источник: "Каçал Ен"