15 апреля 2009 г.
Иртнĕ кунсенче Комсомольски 1-мĕш вăтам шкулĕнче Космонавтика кунне халалласа мероприяти пулчĕ. Ăна чăваш чĕлхипе литературине вĕрентекен Антонина Викторовна Прокопьева йĕркеленĕ. Вăл 5—11-мĕш классенчи ачасене «Чăваш халăхне тĕнче уçлăхне çĕкленĕ паттăр» ятлă электронлă презентаципе паллаштарчĕ. Вĕренекенсем авиаци генерал-майорĕн, А.Г.Николаев космонавтăн, Совет Союзĕн икĕ хут Геройĕн пурнăçĕпе тĕплĕн паллашрĕç. Пирĕншĕн, чăвашсемшĕн, Андриян Николаев чăннипех те çăлтăр. Унăн вĕçевĕсем пĕтĕм тĕнчене чăвашсем çине урăхла пăхма пуçлаттарнă. Паллах, ку мероприятие Антонина Викторовна чăваш чĕлхин пĕлтерĕшне ÿстерес, паттăрлăх тĕслĕхĕпе воспитани парас, ачасен тавракурăмне анлăлатас тĕллевпе ирттернĕ.
Сăмах май каласан, А.В.Прокопьева учительте 22 çул ытла тăрăшать. Вăл хăйĕн кашни вĕренекенĕ патне шанчăклă çул тупнă. Çакна вара чун-чĕрепе педагог пулмасăр ниепле те пурнăçа кĕртме çук. Унăн вĕренекенĕсем тĕрлĕ шайра иртекен конкурссенче, олимпиадăсенче, вăйăсенче лайăх енчен палăраççĕ. Ку — вĕрентекеншĕн чăн-чăн телей.
Источник: "Каçал Ен"