15 апреля 2009 г.
Районти ял хуçалăх предприятийĕсенче техника тĕрĕслевĕсем малалла пыраççĕ. Çурри ытла ĕнтĕ ун витĕр тухрĕç. Ытти çулсемпе танлаштарсан кăтартусем япăх мар. Темле кăткăс пулсан та хуçалăхсем яваплăха туяççĕ. Çурхи ака-суха ĕçĕсене вăхăтра тата пахалăхлă ирттерсе ярасшăн. Паянхи кун ыйтăвне тивĕçтерекен тракторсем, кăкарса ĕçлемелли техника туянаççĕ. Агротехникăн çĕнĕ йышши меслечĕсене алла илесшĕн тимлеççĕ. Ку енĕпе пĕр-пĕрин опычĕпе паллашаççĕ. Паянхи кун çакă пĕлтерĕшлĕ.
Çурхи ака-суха ĕçĕсем пуçланнă тесен те юрать. Хăш-пĕр хуçалăхсенче каçпа тата ире хирĕç шăнтнипе усă курса тракторсем хире тухнă. Нумай çул ÿсекен курăксене тата кĕр тыррисене апатлантараççĕ. Укçа-тенкĕ енчен йывăр е ĕçе пĕлсе йĕркелеменнине пула кăткăс лару-тăрăва кĕрсе ларнисем те пур-ха. Çакă техника тĕрĕслевĕн вăхăтне тăсса пынă пирки те сисĕнет. Куратпăр ĕнтĕ, çанталăк пире кĕтмест. Кунсерен вăл улшăнса пырать: çавăнтах ăшăтать те, шăнтать те. Кашни хуçалăхрах ака-сухапа çыхăннă ĕçсене ирттерме хатĕр пулмалла.
Техосмотрта яланхи пекех «Рассвет», «Труд», «Луч», «Восток», «Асаново» хуçалăхсенчи транспорт хатĕрĕсем юсавлă пулчĕç, лайăх енчен палăрчĕç. Уйрăмах «Слава» ял хуçалăх кооперативĕнчи техника пирки калас килет. Пурте юсавлă, паян тесен паян вĕсемпе ĕçре усă курма пулать.
Тĕрĕслев вăхăтĕнче ял хуçалăх енĕпе ĕçлекен 200 яхăн трактора тĕрĕсленĕ. 76 процентне лайăх енчен хак панă. Прицепсен 58 проценчĕ ĕçе кĕме юрăхлă. «Труд», «Луч», «Слава» ял хуçалăх кооперативĕсенче, «Слава картофелю» агрофирмăра ака-суха ĕçĕсене пахалăхлă ирттерес пирки иккĕленме кирлĕ мар. Унта эпир пысăк кăлтăксем асăрхамарăмăр. «Турхан», «Изамбаево» хуçалăхсенче те техника енĕпе лайăх улшăнусем курăнаççĕ. Йывăрлăхсем пур пулин те малаллах талпăнаççĕ.
«Алга» хуçалăхра тата тепĕр темиçе кооперативра механизаторсем çитмеççĕ. Ытти çĕрте ку енĕпе пысăк проблемăсем çук. Акни çеç мар, ăна пуçтарса илес енĕпе те ĕçлеççĕ. Юлашки çулсенче ку енĕпе çĕнĕ техника та туянаççĕ. Паянхи кун ыйтăвне тивĕçтерекен «Полесье» 5 комбайн пурччĕ. Ăна иртнĕ çул «Рассвет», «Труд» хуçалăхсем туянчĕç. Машинăпа трактор паркне татах та çĕнетсе пыраççĕ. Кăкарса ĕçлемелли агрегатсем илсе килеççĕ.
Хуçалăхсем çĕнĕ йышши техника туянма тăрăшаççĕ. Ку енĕпе çĕнĕ меслетсемпе усă курмалли агрегатсем çине витĕмлĕрех пăхаççĕ.
Источник: "Каçал Ен"