08 апреля 2009 г.
Районти ял хуçалăх предприятийĕсем выльăх-чĕрлĕхрен продукци илес енĕпе республикăра та палăрса тăраççĕ. Сăвăм пысăк, ÿт хушаслăх енĕпе кăтартусем аван. Сĕт пахалăхĕ лайăх. Çакă ют çĕршывсенче туса кăларнă сĕт сумалли аппаратсем вырнаçтарнипе те çыхăннă.
Кăçалхи 3 уйăхра районти сĕт-çу фермисенче ĕçлекенсем пурĕ 25552 центнер сĕт, 2639 центнер аш-какай туса илнĕ. Ку енĕпе яланхи пекех «Рассвет», «Слава», «Искра», «Восток», «Асаново», «Луч» хуçалăхсем лайăх ĕçлеççĕ.
Мăйракаллă шултра выльăх пуçĕ ÿснĕ. Пĕлтĕр январь-— март уйăхĕсенче 6988 пуç пулнă, кăçалхи çак вăхăт тĕлне 7323 пуçа çитнĕ. «Восток», «Дружба», «Труд», «Сюрбеево», «Победа» хуçалăхсем çак выльăх йышне ÿстернĕ. Сынасен шучĕ çулсеренех чакса пырать. Иртнĕ çул фермăсенче 5293 пуç тытнă. Кăçалхи апрелĕн 1-мĕшĕ тĕлне 4217 пуç анчах юлнă. Хальхи вăхăтра районти 9 хуçалăхра çеç сыснасем тытаççĕ.
Çамрăк выльăхсăр кĕтÿ çĕнелмест. Пăру илес енĕпе «Дружба», «Сюрбеево», «Восток» хуçалăхсем лайăх ĕçленĕ.
Мăйракаллă шултра выльăхсем ÿт хушасси «Урожай» колхозăн (672 грамм), «Победа» ял хуçалăх кооперативĕн (627 грамм) аван. Ку енĕпе «Восток», «Пайгас», «Рассвет» хуçалăхсем те япăх мар ĕçлеççĕ. Сыснасем те асăннă хуçалăхсенчех самăр.
Ĕçлесен, тăрăшсан выльăх-чĕрлĕх отраслĕ укçа-тенкĕ парать. Апат çителĕклĕ хатĕрлесен, витесене вăхăтра юсасан ÿсĕмсем пулаççех.
Источник: "Каçал Ен"