04 апреля 2009 г.
Чирлĕ çыннăн сывлăхне тĕрĕслесси — тухтăрсен тивĕçĕ. Вĕсем хăйсен пациенчĕсене яланах пулăшма хатĕр. Çав вăхăтрах медицинăра çĕнĕ йышши паха техника ĕçлени те çынна вăхăтра сыватма е чирне çийĕнчех асăрхама май парать.
Районти тĕп больница та çулсеренех çĕнĕ йышши аппаратсем туянма тăрăшать. Çынсем кунтах сипленме пултарччăр теççĕ тухтăрсем. Акă, нумаях пулмасть тĕп больницăри пĕтĕмĕшле практика врачĕн уйрăмĕнче озонотерапи кабинечĕ хута кайрĕ. Историе аса илес пулсан кун йышши сиплевпе иртнĕ ĕмĕрĕн 30-мĕш çулĕсенчех усă курма пуçланă. Районти пациентсем ку мелпе сипленме Шупашкар, Çĕнĕ Шупашкар, Канаш хулисене ятарласа çÿренĕ. Паян вара районтах озонотерапи кабинетĕнче сипленме май пурри тухтăрсемшĕн те, уйрăмах чирлĕ çынсемшĕн паха. Çак кабинета ертсе пыма, пациентсене сиплеме Вячеслав Анатольевич Мурзаев реаниматолога, трансфузиолога шаннă. Ăна кулленхи ĕçре Э.Кудрявцева медсестра пулăшать.
«Район больницинче çакăн пек кабинет пурри, унта кашниех сипленме пултарни калама çук лайăх. Паянхи куна сипленес текенсен йышĕ ÿссех пырать. Пациентсем хăйсене лайăхрах туйма пуçланине, сывалнине палăртаççĕ», — тет В.Мурзаев.
— Вячеслав Анатольевич, кăмăл пуррисем пурте килме пултараççĕ-и?
— Чи малтанах тухтăр патĕнче пулмалла. Вăл çеç сире сĕнÿ пама пултарать. Тĕслĕхрен, панкреатит, тиреотоксикоз, геморраги инсульчĕпе, миокард инфаркчĕпе, гемофили, васкулит тата ытти чирпе аптракансене ку мелпе сипленме сĕнмеççĕ. Ытларах чĕре чирĕпе чирлекенсемшĕн, пÿрепе нушаланакансемшĕн кислородпа пуян раствор паха. Çавăн пекех операци хыççăн вăй илме, сурансене хăвăртрах тÿрлетме те, иммунитета çирĕплетме те çак процедурăсене сĕннĕ пулăттăм. Ытти нумай чиртен те сипленме пулать. Килĕр, эпир сире яланах хавас, — пĕлтерчĕ Вячеслав Анатольевич.
Кабинетра çĕнĕ йышши «Медозон» аппаратура ĕçлет. Вăл пациентсене валли кислородпа, озонпа пуян раствор хатĕрлет. Ун хыççăн ăна юн тымарне яраççĕ. Процедурăсене вăтамран 5 хутчен ирттермелле.
Озонотерапи пÿлĕмĕ кашни кун ĕçлет. Вăл пациентсемшĕн чăннипех те паха пуласса шанас килет.
Источник: "Каçал Ен"