25 марта 2009 г.
Мартăн 20-мĕшĕнче тĕп хулари К.В.Иванов ячĕллĕ Чăваш патшалăх академи драма театрĕнче Чăваш наци конгресĕн VII Аслă пухăвĕ ĕçленĕ. Унта Раççейĕн 26 регионĕнчен 650 йăхташ хутшăннă. Кунсăр пуçне чикĕ леш енчен ултă çĕршыври делегаци килсе çитнĕ. ЧНК Ваттисен Канашĕн мухтавлă çыннисем Н.Е.Наумов, В.К.Кузьмина, В.А.Дедушкин Аслă пухăва килнисене пил панă. Кун йĕркинче çакăн пек ыйтусем пулнă: Чăваш наци конгресĕн президенчĕн Г.Н.Архиповăн «Икĕ Аслă пуху хушшинче туса ирттернĕ ĕçсем тата малашлăх тĕллевсем çинчен», «Чăваш наци конгресĕн Уставне улшăнусем кĕртесси çинчен» çум докладсем, делегатсем тухса калаçни.
ЧР Президенчĕ Н.В.Федоров сăмах тухса каланă. Республикăри ĕç-хĕлпе, çитĕнÿсемпе, малашнехи тĕллевсемпе паллаштарнă. ЧНК президенчĕ Г.Н.Архипов та хăйĕн докладĕнче чăваш халăхĕ, чĕлхе енĕпе çыхăннă çивĕч ыйтусене хускатнă. Раççей халăхĕсен ассамблейин ертÿçи Р.Г.Абдулатипов общество майĕпе ĕçлекен организацин ĕçĕсем тата чăваш халăхĕн пĕлтерĕшĕ пирки чарăнса тăнă. Вăл ЧР Президентне Н.В.Федорова Ассамблейăн медалĕпе наградăланă. Чăваш Республикин хисеплĕ гражданинĕ Г.Н.Волков академик тата ыттисем те тухса калаçнă.
Конгресс ĕçне çавăн пекех ЧР Патшалăх Канашĕн Председателĕ М.А.Михайловский, ЧР Министрсен Кабинечĕн Председателĕн çумĕ — Чăваш Республикин Раççей Президенчĕ çумĕнчи полномочиллĕ представителĕ, çĕршыври чăвашсен наци культура автономийĕн ертÿçи Г.С.Федоров, ЧР культура министрĕ Р.М.Лизакова, ЧР вĕрентÿ министрĕ Г.П.Чернова тата ытти паллă йăхташсем хутшăннă. Конгрес ĕçленĕ вăхăтра чылай мероприяти иртнĕ.
Источник: "Каçал Ен"