25 марта 2009 г.
«Кĕтне» ентешлĕх уявне ирттерменни 3—4 çул та пулĕ. Çавăнпа тĕп хуламăрта пурăнакансем хушшинче «пирĕн ентешлĕх пĕтсех ларман-ши;» тесе иккĕленекенсем те пулчĕç.
Мартăн 21-мĕшĕнче вара Çĕнĕ Шупашкарти «Химик» культура керменĕнче «Кĕтне» ентешлĕхĕн черетлĕ уявĕ иртрĕ. Ăна Комсомольски районне туса хунăранпа 70 çул çитнĕ ятпа йĕркеленĕ. Концерт пуçланиччен фойере Комсомольски район энциклопедийĕн презентацийĕ пулчĕ. Кăмăл тăвакансем çак кĕнекене туянма та пултарчĕç. Сутакансем каланă тăрăх, илсе кайнă пĕр энциклопеди те юлман. Хулара пурăнакан ентешĕмĕрсене тăван районăмăрăн историйĕ, паллă çыннисен шăпи кăсăклантарни питĕ савăнтарать. Комсомольски райповĕн магазинĕсем вара туянакансене тĕрлĕ ĕçме-çиме сĕнчĕç. Каçал тăрăхĕнче çуралса ÿснĕ, Шупашкарпа Çĕнĕ Шупашкар хулисенче тĕпленнĕ ентешĕмĕрсен пĕр-пĕрне курса чунтан калаçма та, çĕнĕ хыпарсене пĕлме те вăхăт çителĕклĕ пулчĕ.
«Мĕншĕн тĕп хуламăрта мар, Çĕнĕ Шупашкарта ирттернĕ-ха ентешлĕх праçникне;»— тесе ыйтĕ вулаканăм. Мĕншĕн тесен çак шĕкĕр хула пирĕн районшăн çулран çул çывăхрах та çывăхрах пулса пырать. Çĕнĕ Шупашкар хулипе Комсомольски районĕ килĕштерсе ĕçлесси, спортра тупăшасси çинчен ик муниципалитет хушшинчи килĕшĕве тахçанах алă пусса çирĕплетнĕччĕ. Кунсăр пуçне, халь ĕнтĕ унти тĕп пуçлăхсем, В.Артемьевпа М.Козлов, иккĕшĕ те пирĕн ентешсем. Пĕри ача чухне Аслă Çĕрпÿелĕнче çарран чупнă, иккĕмĕшĕ Асанкасси вăрманĕн сиплĕ сывлăшĕпе ÿссе çитĕннĕ. Çак хулари ГИБДД начальникĕ И.Иванов та пулин ют çын мар вĕт, Аслă Чурачăк каччи. Халь пĕлтĕр-и ĕнтĕ çак хулара саркаланса çÿреме пирĕн пĕтĕм ирĕк пуррине;
Уявăн савăнăçлă пайне уçса Комсомольски районĕн тата Çĕнĕ Шупашкар хула администрацийĕн пуçлăхĕсем Геннадий Волковпа Вениамин Артемьев, хула ертÿçи — Çĕнĕ Шупашкар хула депутачĕсен Пухăвĕн председателĕ Михаил Козлов, «Кĕтне» ентешлĕх председателĕ Валери Туркай пухăннисене ăшшăн саламларĕç, ăнăçу сунчĕç. Каçалсене Патăрьел ентешлĕхĕн председателĕ Владимир Семенов, хамăр ентеш, халĕ Красноярск крайĕнчи чăвашсен автономийĕн ертÿçи Геннадий Храмов тата ыттисем те уяв ячĕпе салам сăмахĕсем каларĕç.
Районăн 70 çулне халалланă «Кĕтне тăрăхĕ, мухтав сана!» концерт программи питĕ пуян та интереслĕ пулчĕ. Районтан кайнă художество пултарулăх коллективĕсем, уйрăм юрăçсемпе ташăçăсем куракансене хăйсен ăсталăхĕпе, мăнаçлă сассисемпе чăннипех тĕ-лĕнтерчĕç. Александровка ял поселенийĕнчи пултарулăх ушкăнне, Урмаелĕнчи «Мишар», «Комсомольское» культурăпа кану центрĕ çумĕнчи вокал ансамблĕсене хуть паянах Мускаври сцена çине кăлар! Унта та намăс кăтартмĕç тесе шутлатăп. Ачасен Комсомольскинчи искусство шкулĕн воспитанникĕсем илемлĕ ташăсем парнелерĕç. Паллах, çĕнĕшупашкарсемпе шупашкарсем те хăйсен пултарулăхĕпе паллаштарчĕç. Пĕртăван Малинасене, Светлана Яковлевăна, Виталий Адюкова, Светлана Печниковăна, «Уяв» фольклор ансамбльне куракансем ăшшăн кĕтсе илчĕç, чунтан тухакан юррисемшĕн алă çупса хавхалантарчĕç. Артисчĕсем ытла маттур та ăста пулнăран-и, икĕ сехете пынă концерт пĕр самантра иртнĕ пек туйăнчĕ.
Источник: "Каçал Ен"