14 марта 2009 г.
Çак кунсенче Шупашкарта Травматологи, ортопеди тата эндопротезировани центрĕ уçăлнă. Медицина технологийĕсен çÿллĕ шайри аталанăвĕ Чăваш Ене çитнине чи малтанхи пациентсем хăйсем çинче «тĕрĕсленĕ те ĕнтĕ».
Пĕрремĕш операцисем (8 пациент) мĕнле иртессине уçăлнă центрăн квалификациллĕ тухтăрĕсем çеç мар, ЧР сывлăх сыхлавĕпе социаллă аталану министрĕ Н.Суслонова та, Раççей Патшалăх Думин Çĕршывсен хушшинчи ĕçсен комитечĕн председателĕ К.Косачев та, республикăри массăллă информаци хатĕрĕсен ĕçченĕсем те пăлханса кĕтрĕç.
Пĕрремĕш операцие Чăваш Енĕн тĕп травматологĕ Алексей Карпухин ирттерчĕ. Эндопротезировани меслечĕпе купарчапа пĕçĕ сыппине сиплесси пулчĕ унăн тĕллевĕ. Тухтăр каланă тăрăх, протезăн çакнашкал тĕсĕ çамрăк пациентсемшĕн юрăхлă, вăл çынсене сывлăха сиенлемесĕр кирек мĕн чухлĕ хускану тума май парать. Шăмă сыппине сиктерес хăрушлăх та çук-мĕн. «Металпа металл» сĕртĕнĕвĕ «ют» сыппа организмра вăрах вăхăтлăх тĕрĕс-тĕкел вырнаçма май парать иккен.
— Операцисем çÿллĕ шайри технологи çинче никĕсленчĕç. Пур пĕр пăшăрхантăр-и? — кăсăкланчĕç журналистсем Санкт-Петербургри Вреден ячĕллĕ травматологипе ортопеди институчĕн директорĕпе Рашид Тихиловпа калаçнă май.
— Малтанласа, паллах, чун вырăнта марччĕ. Калăпăр, халичченхи меслетпе ирттернĕ операцисенче йăнăшас хăрушлăх 5—7 процент пулнă. Навигациллĕ компьютер протеза тĕп-тĕрĕс вырнаçтарма май панине пĕлнĕрен питех пăлханма сăлтав çукчĕ. Пушшех те — хирургсем пурте пысăк опытлă вĕт,— хуравларĕ вăл.
Константин Косачев хăйĕн шанăçĕ тÿрре тухнăшăн (влаçрисем асăннă центра хăш регионта уçас пирки тавлашнă чух вăл ку ĕçе Чăваш Енре вăхăтра та пысăк тимлĕхпе пуçăнма пултарасса пĕлтернĕ) хĕпĕртенине пытармарĕ. Травматологи, ортопеди тата эндопротезировани центрĕнчи ĕç-хĕле паян космос вĕçевĕ пек мар, стандарт вырăнне хурса йышăнмаллине палăртрĕ. Кунти сиплев наци малашлăхĕшĕн те пĕлтерĕшлĕ пулнине çирĕплетрĕ.
Тĕнче шайĕнчи медицина учрежденийĕ хамăрăн регионти çеç мар, Раççейĕн ытти субъектĕнчи пулăшу кĕтекен çынсене те йышăнĕ. Хальлĕхе кăна черетре — 2,5 пин çын. ЧР сывлăх сыхлавĕн министрĕ Н.Суслонова малашне протезсене республикăрах туса кăларма тытăнасси çинчен калаçу пулнине пытармарĕ те (тен, хамăрăн йÿнĕрех пулĕ;) — çĕнĕ меслетсемпе ĕçлекен травмцентр çитес вăхăтра хăйĕн хăватне ÿстерме те пултарĕ.
Источник: "Каçал Ен"