14 марта 2009 г.
Районти учительсем хушшинче пĕр-пĕрин опычĕпе паллашас тĕлĕшпе йĕркелекен фестивальсене ирттересси йăлана кĕнĕ. Çак тĕл пулусенче учительсем уçă уроксем ирттереççĕ, хăйсен ĕçĕнче усă куракан çĕнĕлĕхсемпе ыттисене паллаштараççĕ.
Акă, пуш уйăхĕн 10-мĕшĕнче Комсомольски 2-мĕш вăтам шкулне ют чĕлхе вĕрентекенсем пуçтарăнчĕç. Урăх шкулти ачасемпе урок ирттересси çăмăл мар пулин те, Кĕçĕн Çĕрпÿел, Тукай Мишер, Нĕркеç, Хырай Ĕнел вăтам шкулĕсенчи О.А.Ефремова, Г.М.Хайртдинова, Г.М.Смирнова, Л.В.Смирнова çак ĕçе питĕ лайăх та туллин пурнăçларĕç. Хăнасене йышăнакан учительсем те: Т.П.Иванова, А.Н.Сорокина, С.Н.Леонтьева ĕçтешсене хăйсен пултарулăхĕпе паллаштарчĕç. Жюри членĕсем уçă уроксем çÿллĕ шайра пулнине палăртрĕç. Урок ирттерекенсене, çавăн пекех хăйсен методика ĕçĕсене выставкăна тăратакансене грамотăсемпе, асăнмалăх парнесемпе чысларĕç. Çак фестивале йĕркелеме пулăшнăшăн «Мир» ял хуçалăх кооперативĕн директорне М.Л.Кольцовăна, район администрацийĕн вĕрентÿ пайне, Комсомольски 2-мĕш вăтам шкул дирекцине пысăк тав сăмахĕ калас килет.
Источник: "Каçал Ен"