25 февраля 2009 г.
Шупашкарта февралĕн 19—20-мĕшĕсенче «Çĕрулми-2009» выставка иртнĕ. Унта хутшăнакансене ЧР Президенчĕ Н.Федоров саламланă. Вăл Мускав мэрĕпе Ю.Лужковпа Раççей тĕп хулине нумай çул чăваш çĕрулмийĕпе тивĕçтерсе тăма йышăну туни çинчен пĕлтернĕ.
Курава пурĕ 47 предприятипе организаци хутшăннă. Вĕсенчен 2-шĕ — Германирен, 13-шĕ — Мускавпа Санкт-Петербург хулисенчен, Мускав, Ленинград, Воронеж, Самар, Чулхула облаçĕсенчен, Краснодар крайĕнчен, Тутарстан Республикинчен. Чăваш Енрен 32-шĕ хăйсен продукцине кăтартнă. Çавăн пекех унта Раççейри «Евротехника» АУО, «Агропарк», «Август», «Агротрейд» фирмăсен экспоначĕсем те пулнă.
Выставкăна килнисем пирĕн районти «Слава картофелю» агрофирма çитĕнтернĕ çĕрулмин тĕрлĕ сорчĕсемпе те паллашнă.
900 тăваткал метр йышăннă куравра çĕрулми ÿстерес ĕçри çĕнĕлĕхсемпе, тухăçлă сорт-гибридпа, ÿсентăрана хÿтĕлемелли тĕрлĕ имçампа, «иккĕмĕш çăкăра» упрамалли тата тирпейлемелли паянхи кун шайĕнчи технологипе анлăн паллаштарнă. Унтах вăрлăх çĕрулми те сутнă. 2009 çулта «иккĕмĕш çăкăрпа» тивĕçтерес енĕпе килĕшÿсем те çырнă.
Ярмăркка-выставкăна пирĕн республикăна ĕçлĕ визитпа килнĕ Мускав правительствин министрĕ, Апат-çимĕç департаменчĕн ертÿçи А.И.Бабурин та çитсе курнă. Мускава 57 регионтан çĕрулми килет. «Иккĕмĕш çăкăрпа» тивĕçтерес тĕлĕшпе Чăваш Республики — 2-мĕш вырăнта.
Чăваш патшалăх ял хуçалăх академийĕнче «Çĕрулми çитĕнтерес ĕçри инноваци аталанăвĕн малашлăх тĕллевĕсем» ăслăлăхпа практика конференцийĕ иртнĕ.
Выставка пирки пирĕн районти «Слава картофелю» агрофирмăн генеральнăй директорĕ Х.С.Идиатуллин акă мĕн каласа панă: «Халиччен çакнашкал форумсем Мускавра иртетчĕç. Ку хутĕнче вара ăна Шупашкарта йĕркеленĕ. Чăваш Еншĕн ку пысăк пĕлтерĕшлĕ. Вăл пире çĕнĕ партнерсем тупас, ĕçлĕ çыхăнусем йĕркелес енĕпе пысăк пулăшу кÿрĕ».
Комсомольски районĕ республикăра чи пысăк лаптăк çинче «иккĕмĕш çăкăр» çитĕнтернĕ май çакăн пек мероприятисем хуçалăхсене пысăк пулăшу кÿрĕç.
Источник: "Каçал Ен"