14 февраля 2009 г.
Нарăс уйăхĕн 10-мĕшĕнче наука кунне халалласа Комсомольски 2-мĕш вăтам шкулĕнче «Наука. Пултарулăх. Аталану» наукăпа практика конференцийĕ иртрĕ. Конференцие 40 ача хутшăнчĕ. Вĕсем хăйсен тĕпчев ĕçĕсене «Математика. Информатика. Физика», «Хими. Биологи. Экологи. Географи», «Истори. Тăван ен культури тата историйĕ», «Ют чĕлхесем», «Вырăс чĕлхипе литератури» секцисенче хÿтĕлерĕç. Кăçал конференцие хутшăнакансем хушшинче аслă классенче вĕренекенсем çеç мар, 7—8-мĕш классен ачисем те пулчĕç. Хăш-пĕрисем вара ĕçĕсене икĕ секцире хÿтĕлерĕç. Сăмахран, 9-мĕш «а» класра вĕренекен Юлия Чернова «Математика» секцийĕнче 1-мĕш вырăн, «Биологи. Хими» секцийĕнче 2-мĕш вырăн йышăнчĕ. Çавăн пекех 11-мĕш «в» класра вĕренекен Эльвира Вахитова та икĕ ĕç хÿтĕлесе 1-мĕшпе 3-мĕш вырăнсене çĕнсе илчĕ. 9-мĕш класра вĕренекен Гузеля Гинетуллина икĕ 2-мĕш вырăн, Анастасия Андреева икĕ 3-мĕш вырăн йышăнма пултарчĕç. Ачасем ытларах «Математика. Информатика. Физика», «Вырăс чĕлхипе литератури» секцийĕсенче пулчĕç. «Ют чĕлхесем» секцире уйрăмах 11-мĕш «а» класра вĕренекен Аня Ананьева «Английские монархи-женщины» темăна уçса пани комисси членĕсене килĕшрĕ. Татьяна Алексеева Барак Обама çинчен каласа пани те хаклавçăсен кăмăлне кайрĕ. Мария Минина (8-мĕш класс), Гузеля Гинетуллина (9-мĕш класс) Комсомольски районĕн историне тĕпчесе çырнă ĕçсем те пысăк хака тивĕçрĕç.
Источник: "Каçал Ен"