04 февраля 2009 г.
Районти вĕрентÿ тытăмĕнче ĕçлекен профсоюз членĕсем хушшинче тăтăшах тĕрлĕ ăмăртусем иртеççĕ. Акă, кăрлачăн 31-мĕшĕнче Хырхĕрри тĕп шкулне йĕлтĕрçĕсем чылайăн пухăнчĕç. Кунта вĕрентÿ учрежденийĕсенче вăй хуракан профсоюз членĕсем ăмăртăва тухрĕç. Тупăшу чăнах та хĕрÿ иртрĕ. Хĕрарăмсем 2 километр, арçынсем виçĕ километр чупрĕç. Пурĕ 23 команда тупăшăва тухрĕ. Чи пултаруллисем Хирти Явăш вăтам шкулĕн спортсменĕсем пулчĕç. Вĕсем — пĕрремĕш вырăнта. Хырхĕрри тĕп шкулĕн профсоюз членĕсем – иккĕмĕш, аслăчурачăксем – виççĕмĕш.
Чи ăста та маттур спортсменсене çулĕсене кура палăртрĕç. Хĕрарăмсенчен А.Калюкова, И.Миронова, И.Исаева (Асанкасси), Т.Петрова (Çĕнĕ Мăрат), Л.Кузьмина (Аслă Чурачăк), Г.Давыдова (Хирти Явăш), В.Кротова (Нĕркеç), А.Титова (Комсомольски 1-мĕш вăтам шкулĕ) йĕлтĕрпе финиша чи малтан çитме пултарчĕç. Арçынсенчен Р.Гареев (Тукай Мишер), Д.Дмитриев (Йăлмахва), А.Осипов (Чĕчкен), В.Гордеев (Комсомольски 1-мĕш вăтам шкулĕ), Ю.Емельянов (Тăманлă Выçли), В.Гаврилов (Шурут), А.Давыдов (Хирти Явăш), Н.Ятманов (Хырхĕрри) палăрчĕç.
Районти вĕрентÿ тытăмĕнче ĕçлекен профсоюз членĕсен председателĕ А.А.Яковлев, Хырхĕрри тĕп шкулĕн директорĕ Ю.Н.Алексеев, физкультура учителĕ Н.Н.Ятманов ăмăртăва çÿллĕ шайра ирттерес тесе чылай тăрăшрĕç. Йĕлтĕр çине педагогсем çеç мар, вĕрентÿ учрежденийĕн ытти ĕçченĕсем те тăчĕç.
Çак кун пуриншĕн те уяв пулчĕ. Старта тухнисем йĕлтĕрпе савăнса ярăнчĕç, сывлăхне çирĕплетрĕç, пĕр-пĕринпе курса калаçрĕç.
Источник: "Каçал Ен"