31 января 2009 г.
2010 çулхи октябрь уйăхĕнче Пĕтĕм Раççейри халăх перепиçĕ пуласси çинчен район çыннисем пĕлеççĕ ĕнтĕ. Çав кунччен вăхăт нумай пек туйăнать. Халăх çыравĕ енĕпе тимлекен районти комиссишĕн вара иртнĕ çулах хатĕрленÿ ĕçĕсем пуçланнă. 2008 çулта комиссин 3 ларăвĕ иртнĕ. Вĕсенче адрес хуçалăхĕнче йĕрке тăвасси, халăха шута илесси епле пулса пынине, паспорт режимне пăхăннине сÿтсе явнă. 2009—2010 çулсем валли ĕç планне палăртнă.
Ял поселенийĕсенче те халăх çыравне тăрăшсах хатĕрленеççĕ. Пĕлтĕр адрес хуçалăхне йĕркене кĕртес тесе районти 9286 çурта, 341 урампа тăкăрлăка (100 процент) тĕрĕсленĕ. Хальхи вăхăтра ял поселенийĕсем тупса палăртнă çитменлĕхсене пĕтерес енĕпе тăрăшаççĕ. Çак ĕçе кăçалхи июлĕн 1-мĕшĕ тĕлне вĕçлемелле.
2009 çулăн пĕрремĕш çурринче ялсенчи çуртсен списокне хатĕрлемелле, кайран çав кăтартусем тăрăх перепиç, инструктор, шутлав участокĕсем çине пайламалла.
Пирĕн умра тăракан тĕп задачăсенчен пĕри — районти халăх шутне тĕрĕс те туллин палăртасси. 2009 çулхи январĕн 1-мĕшĕ тĕлне районта пурăнакан пĕтĕм çын патне çитнĕ. Тĕрĕслев вăхăтĕнче хуçалăх кĕнекисене çырман 127 çынна тупса палăртнă. Паллах, вĕсем списока кĕмесĕр те юлма пултарнă. Куçса кайнă пулин те, 13 çынна хуçалăх кĕнекинчен кăларман. 138 çын вара вăхăтлăха урăх çĕрте пурăнни пирки пĕлтермен.
2010 çулхи халăх çыравĕн кăтартăвĕсем тулли пулччăр тесе район çыннисене хăйсем пурăнакан вырăнне улăштарни çинчен ял поселенийĕсене вăхăтра пĕлтерме ыйтатпăр. Никам та шута илĕнмесĕр ан юлтăрччĕ.
Источник: "Каçал Ен"