24 января 2009 г.
Январĕн 21-мĕшĕнче районта черетлĕ информаци кунĕ иртрĕ. Чăваш Республикин Президенчĕ Патшалăх Канашне янă черетлĕ çырăва, «Чăваш Республикинчи ял тăрăхĕсенче çурт-йĕре комплекслă майпа компактлă лартас тата вĕсене тирпей-илем кĕртес енĕпе пилотлă проекта пурнăçласси çинчен» указа ял çыннисемпе сÿтсе явасси, ялта пурăнакансен пурнăç условийĕсене лайăхлатма пулăшасси информаци кунĕн тĕп тĕллевĕсем пулчĕç. Ял çыннисемпе тĕл пулма, районти предприятисемпе учрежденисен ĕçĕ-хĕлĕпе паллашма ЧР тĕп суд приставĕ И.Ю.Корсаков, ЧР Патшалăх Канашĕн депутачĕ Ю.М.Кислов, Хула строительствипе обществăлла инфраструктура аталанăвĕн министерствин патшалăх экспертизин управлени начальникĕ Н.И.Баскаков, культура ĕçченĕсен профсоюз комитечĕн председателĕ С.В.Демидова, ЧР Промышленноçпа энергетика министерствин консультанчĕ Е.А.Иванова килсе çитрĕç.
Чи малтанах информаци кунне хутшăнакансене район пуçлăхĕ Г.Волков кун йĕркипе паллаштарчĕ. Сумлă хăнасем район администрацийĕн пысăк залĕнче ЧР Президенчĕн стипендине тивĕçнĕ хĕрсемпе каччăсене саламларĕç, свидетельство парса чысларĕç. Вун икĕ яш-кĕрĕмпе хĕр вĕренÿри, ĕçри пултарулăхшăн стипендие тивĕçнĕ те.
Район пуçлăхĕ Г.Волков ертсе пыракан ушкăн чи малтанах «Нур» ял хуçалăх производство кооперативне çитсе курчĕ. З.Заргиров кооперативĕ — сĕтпе чи ăнăçлă та тухăçлă ĕçлекеннисенчен пĕри. Кунта кунне 50 тонна яхăн сĕт пуçтараççĕ. Продукцие Шупашкар, Çĕмĕрле хулисене, Ульяновск облаçне ăсатаççĕ. «Сĕте ытларах ял çыннисенчен, хуçалăхсенчен пуçтаратпăр. Продукцие хатĕрлеме кооперативра сивĕтмелли 6 танк ĕçлет»,— терĕ ĕçĕпе паллаштарса З.Заргиров. Хăнасем лабораторинче те пулса курчĕç. Сĕт пахалăхне кунта пур енчен те тĕплĕн тĕрĕслеме приборсем пур. Ĕçченсем ĕç укçипе вăхăтра тивĕçтернине те каларĕç.
«Агрокабель» ООО-ра та пулчĕ ĕçлĕ ушкăн. Предприятире кабель производствине аталантарма пĕтĕм услови çителĕклĕ. Г.Гончаров ертÿçĕ предприяти ĕçĕпе тĕплĕн паллаштарчĕ.
«Кооператор» ПК — районта чи ăнăçлă ĕçлекенсенчен пĕри. Вĕсем хатĕрлекен продукципе пурте кăмăллă. И.Корсаков та «Кооператор» ПК ĕçне пысăк хак пачĕ. Вĕсем паянхи кун чи тутлă минераллă шыв, лимонад, сăра, кондитер изделийĕсем хатĕрленине каларĕ. Кунта нумай çул ĕçлекенсен, Е.Карпеева ертÿçĕн тÿпи пысăк.
— Малалла ăнтăлатпăр. Продукцин ассортиментне ÿстеретпĕр. Акă, çĕнĕ магазин хута яни те çитĕнÿ. Малашлăх пирки шутлатпăр»,— терĕ Е.Карпеева.
Пĕтĕмĕшле илес пулсассăн, информаци кунне хутшăннисем район пурнăçĕпе кăмăллă юлчĕç. Приема пынă çынсен ыйтăвĕсем çине хуравларĕç. Ял çыннисен пурнăç шайĕ ÿснине палăртрĕç.
Источник: "Каçал Ен"