21 января 2009 г.
Комсомольски 1-мĕш вăтам шкулĕнче «Со скоростью света» хаçат кăларса тăраççĕ. Ку ĕçе хаçатăн тĕп редакторĕ В.Г.Гордеев, информатика учителĕ П.В.Родионов йĕркелесе пыраççĕ. Çак кунсенче çĕршыв шайĕнчи конкурсра çĕнтерни çинчен, Мускав хулинчен вĕсем иккĕшĕ те лауреат ята тата диплома тивĕçнĕ пирки хыпар çитрĕ.
Юлашки çулсенче чылай шулта стена хаçачĕсем вырăнне компьютер технологийĕпе çĕнĕ хаçатсем кăларма пуçларĕç. Комсомольски 1-мĕш вăтам шкулĕнче те «Со скоростью света» ятлă хаçат тухса тăрать. Унăн пĕрремĕш номерĕ 2007 çулхи раштавăн 15-мĕшĕнче кун çути курнă. Ăна çак шкулăн 150 çулхи юбилейне халалланăччĕ.
Унтанпа çулталăк ытла иртрĕ, хаçатăн 10-мĕш номерĕ те кун çути курчĕ. Кĕске вăхăт хушшинче çак хаçат хăйĕн вулаканĕсене тупрĕ тесе каламалла. Мĕнле кăна тема хускатмаççĕ-ши?Шкул ĕçĕ-хĕлĕ пирки, канăва епле ирттерни çинчен тата ытти те.
Çулталăк хушшинче районта, республикăра тата Раççей шайĕнче ирттерекен конкурссене хутшăнчĕç. А-3 форматпа республикăри шкулсенче урăх пĕр хаçат та тухмасть. 1-мĕш вăтам шкул хаçачĕн тематики анлă та пуян. Çак сăлтавсене пула ĕнтĕ вĕсем иртнĕ кунсенче районти «Мастер слова» тата «Сердце матери» конкурссенче пĕрремĕш вырăнсене çĕнсе илчĕç.
Кăрлач уйăхĕнче Мускавран Комсомольски 1-мĕш вăтам шкулне ырă хыпар çитрĕ. «Медиа Союз» тата Раççей Федерацийĕн обществăлла палати çумĕнчи экологи политикипе ĕçлекен комисси журналистсем хушшинче конкурс йĕркеленĕ. Унăн ячĕ — «Экология России. Родные ресурсы ХХI века». Хаçата кăларса тăракан В.Гордеев тата П.Родионов конкурса хутшăнса диплом çĕнсе илчĕç. Çак çитĕнÿпе эпир те вĕсене саламлатпăр, татах та ăнăçусем тума сунатпăр. Сăмах май каласан, В.Гордеев ачасене пĕлÿ парас ĕçре 13 çула яхăн ĕçлет. Чăваш чĕлхин пĕлтерĕшне ÿстерес, чăваш халăх культурине, йăли-йĕркине сыхласа хăварас тата аталантарас тĕлĕшпе ырми-канми тăрăшать Владимир Геннадьевич. Хисеплеççĕ ăна вĕренекенсем тата вĕсен ашшĕ-амăшĕсем, мĕншĕн тесен вăл кашни ачана аталантарассишĕн чунне парса вăй хурать. «Ĕçне кура — хисепĕ»,— теççĕ халăхра.
Источник: "Каçал Ен"