06 декабря 2008 г.
Пирĕн шкулта вĕренекенсем те, учительсем те спортпа туслă. Ахальтен мар аслисемпе кĕçĕннисем час-часах тĕрлĕ ăмăрту ирттереççĕ. Акă, нумаях пулмасть 8—9-мĕш классенчи арçын ачасем пуçарнипе волейбол ăмăртăвĕ иртрĕ. Саша Белков, Сергей Пожеданов, Миша Топтыгин, Артем Школьников чăн-чăн ăста спортсменсем евĕр вылярĕç.
Командăра 6-мĕш класра пĕлÿ пухакан Витя Хлебников пулни малтанах пурне те тĕлĕнтерчĕ. Анчах та каярах вăл аслă юлташĕсенчен пĕртте кая мар вылянине асăрхарăм. Шкул ачисен команди учительсене парăнтарчĕ. Эпир, пăхса тăракансем, пĕрре савăнтăмăр, тепре юратнă учительсемшĕн пăшăрхантăмăр. Пирĕн те вăййа хутшăнас килчĕ. Спортпа туслашни хавас кăмăл, çирĕп сывлăх парнелет.
Источник: "Каçал Ен"