22 ноября 2008 г.
Чăваш Енĕн хастар ĕçченĕсем — тыр-пул çитĕнтерекенсем, аш-пăш туса илекенсем, тутлă çимĕç хатĕрлекенсем — хăйсен професси уявне ноябрĕн 14-мĕшĕнче Шупашкарти Оперăпа балет театрĕнче паллă тунă. Кăçалхи ĕçсене пĕтĕмлетнĕ, малашнехи тĕллевсене уçăмлатнă. 2008 çул ял çыннине çитĕнÿсемпе савăнтарчĕ. Тĕслĕхрен, республикăри хуçалăхсем 535 пин тонна яхăн тырă пухса кĕртнĕ. Пирĕн районти хуçалăхсем те япăх мар ĕçленине палăртма кăмăллă. Чăваш Республикин Президенчĕн ноябрĕн 12-мĕшĕнчи хушăвĕпе килĕшÿллĕн “АПК аталанăвĕ” наци проектне ăнăçлă пурнăçлакан, ял хуçалăх производствине, экономика кăтартăвĕсене ÿстерекен агропромышленноç комплексĕн организацийĕсене, муниципаллă районсене, фермер тата харпăр хăй хуçалăхĕсене Дипломсем, премисем парса чысланă. 2008 çулхи кăтартусемпе пирĕн районти хуçалăхсем те палăрнă. Акă, “Рассвет” ял хуçалăх кооперативĕ кăнтăр зонăри хуçалăхсем хушшинче ял хуçалăх производствине тухăçлă (эффективлă) тытса пынăшăн 1-мĕш вырăн тата 80 пин тенкĕлĕх премие, тухăçлă тата нумай çĕр улми туса илнĕшĕн “Слава картофелю” агрофирма 1-мĕш вырăна тата 50 пин тенкĕлĕх премие тивĕçнĕ. Ял хуçалăх потребителĕсен кооперативĕсен производство тата экономика кăтартăвĕсем тăрăх пирĕн районти потребительсен «Нур» кооперативĕ 3-мĕш вырăна çĕнсе илме пултарнă. “Чăваш Республикинче пĕчĕк тата вăтам предпринимательствăна аталантарассине вăйлатасси çинчен” ЧР Президенчĕн Указне пурнăçлас енĕпе тăрăшса ĕçленĕшĕн тата производствăпа экономика кăтартăвĕсемпе палăрнăшăн Минатуллинăн фермер хуçалăхĕ 2-мĕш вырăн йышăннă. “Пысăк тата вăтам ял хуçалăх организацийĕсене ĕçлеме хавхалантармалли хушма мерăсем çинчен” указа туллин пурнăçлас тĕлĕшпе тăрăшса вăй хунăшăн “Урожай” колхоза 1-мĕш вырăн панă. Маттур!
Источник: "Каçал Ен"