12 ноября 2008 г.
Çĕр çинчи кашни çын пурнăçра çамрăкранах хăйне килĕшекен професси суйласа илет. Кам ачасене вĕрентес, кам çынсене сыватас енĕпе тăрăшать. Теприсем производствăра вăй хураççĕ. Ăçтан пур профессие çырса та, каласа та, кăтартса пĕтерĕн; Аслă Чурачăк ялĕнче 1958 çулта çуралнă Евгений Иванович, Чернов, тăван ялти вăтам шкулта та аван паллăсемпе вĕренсе пынăскер, шут ĕçĕнче ĕçлекен (финансист) пулма шутлать.
Вăл И.Н.Ульянов ячĕллĕ Чăваш патшалăх университетне «бухгалтерский учет и анализ хозяйственной деятельности» специальноçпа вĕренме кĕрет. Кунта пĕлÿ илнĕ вăхăтрах, 1977—1979 çулсенче, СССР Хăрушсăрлăх комитечĕн пограничниксен çарĕнче службăра тăрать. Унтан таврăнсан вĕренĕве вăл малалла тăсать. 1983 çулта хăй суйласа илнĕ специальноçпа аслă пĕлÿллĕ пулнине ĕнентерекен диплом илет. Университета лайăх паллăсемпе çеç пĕтерет Женя. 3 çул РСФСР Госкомсельхозтехникăн чăваш филиалĕнче аслă экономист пулса тăрăшать. 1983 çулта вара хăй çуралса ÿснĕ тăрăха таврăнать, районта агропромышленноç комплексĕнчи плана пурнăçлас тата отрасльсем хушшинчи çыхăнусене йĕркелес енĕпе ĕçлекен тĕп экономистра тăрăшать. Каярахпа ăна райĕçтăвкомăн ял хуçалăх управленийĕн тĕп бухгалтерĕн çумĕ пулма шанаççĕ. Опыт, пĕлÿ, ăсталăх ÿссе пырать. Çавăнпа та ăна районта татах та яваплăрах ĕçсем шанса параççĕ. Унăн должноçĕсем вулакансене интереслентермĕç те. Кирек ăçта тăрăшсан та, Евгений Иванович лайăх специалист пулнине пĕрле тăрăшнă ĕçтешĕсем, хуçалăхсен специалисчĕсем те палăртаççĕ.
Кĕçех Чăваш Республикинчи Федераллă налук службин районсем хушшинчи 2-мĕш номерлĕ инспекцине туса хураççĕ. Вăл Комсомольски, Патăрьел, Елчĕк, Шăмăршă районĕсенчи налук енĕпе ĕçлекенсене пĕрлештерсе тăрать. Малтанхи кунранах ăна Е.И.Чернов ертсе пыма пуçлать. Пуçлăх пуканĕ çинче ларни çеç мар, ăна налукçăсем халăхпа, вырăнти самоуправлени тата правăна сыхлакан органсемпе тачă çыхăну мĕнле тытни те ытларах кăсăклантарать. Специалистсенчен çирĕп ыйтать. Çав вăхăтрах вĕсене ĕçлеме кирлĕ условисем туса парас енĕпе те тăрăшать. Тăрăшать çеç мар, çине тăрать. Офиссене çĕнетеççĕ, вĕсенче паянхи кун ыйтăвне тивĕçтерекен оргтехника хатĕрĕсем вырнаçтараççĕ. Çакă налукçăсемшĕн те, клиентсемшĕн те паха. Офиса килнĕ çынсене нумай кĕттермесĕр, вĕсен ыйтăвĕсене кĕске вăхăтрах татса пама май парать.
Районти чылай çыннăн патшалăх наградисем, Хисеп грамотисем, хаклă парнесем пур. Питĕ мухтанă пек ан пултăр та, юбилей çитнĕ май Е.Черновăн наградисене асăнмасăр ниепле те иртме çук. Экономика тата финанс ĕçĕнче тава тивĕçлĕ ĕçсем тунăшăн ăна 2000 çулта «Чăваш Республикин тава тивĕçлĕ экономисчĕ» хисеплĕ ят параççĕ. 2002 çулта ăна тепĕр награда кĕтет. Налук органĕсем умĕнче тăракан тĕллевсене пурнăçлас енĕпе çине тăрса ĕçленĕшĕн вăл «Раççей Федерацийĕн Налуксемпе сборсен министерствин отличникĕ» паллăна тивĕçет. 2005 çулта Чăваш Республикин Президенчĕн Н.Федоровăн тав хучĕпе, 2008 çулта Чăваш Республикин Хисеп грамотипе чысланă. Унăн пур наградисене асăнса та пĕтереймĕн. Ĕçлекенсене, тăрăшакансене патшалăх хавхалантарсах пырать.
Е.И.Чернов йĕркелесе пынипе налукçăсем ĕçленĕ вăхăтрах республикăра иртекен тĕрлĕ мероприятисене те хастар хутшăнаççĕ. Уйрăмах спорт енĕпе республикăра палăрса тăраççĕ. Акă, иртнĕ çул налук органĕсен ĕçченĕсем хушшинче иртнĕ спартакиадăра 2-мĕш номерлĕ инспекцире вăй хуракансем II степеньлĕ Диплом илме тивĕç пулнă. Иртнĕ çулсенче те вĕсем лайăх енчен палăрса тăнă. Çакă налукçăсем вăй-халлă, сывлăхлă пулнине пĕлтерет. Уншăн тăрăшать те Евгений Иванович.
Вăл культурăллă, интеллигентлă çемьере çуралса ÿснĕ темелле-ши; Ашшĕ-амăшĕ тарăн пĕлÿллĕ, анлă тавракурăмлă çынсем пулнă. Ашшĕнче, Иван Иосифовичра, ертÿçĕ ăсталăхĕ, пултарулăхĕ, хастарлăхĕ тапса тăнă. Вĕсем мăшă-рĕпе, Федосия Яковлевнăпа, çамрăк чухне пĕр вăхăт Хирти Явăш шкулĕнче учительсем пулса ĕçленĕ. Ун хыççăн Иван Иосифовича Аслă Чурачăк вăтам шкулĕн директорне лартаççĕ. Кунта вăл пуçарулăхпа палăрса тăнă. Çакна кура аслăчурачăксемпе чĕчкенсем ăна «Заветы Ильича» колхоз председательне суйлаççĕ. Хуçалăха вăл чылай çул ертсе пырать. Çав тапхăрта колхоз вăйлă аталаннă, производство кăтартăвĕсене ÿстернĕ, фермăн çĕнĕ витисене тунă, машинăпа-трактор паркĕнче гаражсем тата ытти ĕçре кирлĕ хуралтăсем çĕкленĕ. Кĕскен ун ĕçĕ çинчен çапла çеç каласа хăварма пулать. Тăсса ярсан вара... Шел, халĕ вăл пирĕн хушăра çук.
Федосия Яковлевна мĕн тивĕçлĕ канăва кайичченех вырăнти вăтам шкулта ачасене чăваш чĕлхипе литературин предметне вĕрентнĕ, çĕршер ачана пурнăç çул çине кăларнă.
Вĕсем 3 ача пăхса çитĕнтернĕ. Евгений — чи асли. Çавăнпа та унăн яваплăх пысăк пулнă. Ялти ытти ачасенчен ĕçре те, спортра та, культура тата обществăлла мероприятисенче те пултаруллă пулнипе палăрса тăнă. Унран йăмăкĕсем тĕслĕх илсе ÿснĕ. Халĕ Вера Ивановна Аслă Чурачăк вăтам шкулĕн директорĕн вĕрентÿ енĕпе ĕçлекен çумĕнче тăрăшать. Тамара Ивановна — «Труд» ял хуçалăх кооперативĕн правленийĕн шут ĕçченĕ.
Çак кунсенче Е.И.Чернов 50 çула çитрĕ. Çулсем иртеççĕ пулин те унра вăй-хал тапса тăрать. Çулне кăтартрăмăр-ха та, хăй çине пăхсан ун пек калаймăн. Малашне те ăна ăнăçу, телей, вăрăм ĕмĕр, ĕçре вăй-хал сунатпăр.
Источник: "Каçал Ен"