12 ноября 2008 г.
Çулсеренех районта шкул ачисем хушшинче спортăн 16 енĕпе спартакиада ирттереççĕ. Вăл пуçланнă ĕнтĕ. Вĕренекенсем «Каçал ен» хаçат редакцийĕн призĕсемшĕн çăмăл атлетикăпа ăмăртрĕç тата сĕтел çи теннисĕпе тупăшрĕç.
Çак кунсенче вара ачасем шахматла вылярĕç. Вăтам шкулсенче вĕренекенсенчен Хирти Мăнтăр шкулĕнче пĕлÿ илекенсем мала тухрĕç. Иккĕмĕш вырăнта — Кĕçĕн Çĕрпÿел вăтам шкулĕнчи шахматистсем. Асанкассисем виççĕмĕшсем пулчĕç. Пĕтĕмĕшле пĕлÿ паракан тĕп шкулсем хушшинче те ăмăртусем хĕрÿ иртнĕ. Кунта чи нумай очко пуçтарса александровкăсем çĕнтернĕ. Хырхĕрри тĕп шкулĕн спортсменĕсем — иккĕмĕш вырăнта. Чĕчкен тĕп шкулĕнче вĕренекенсем те шахматла аван выляççĕ. Вĕсем виççĕмĕш вырăна алăран вĕçертмерĕç.
Кăçалхи çул вĕçлениччен шкул ачисен спартакиада шучĕпе армреслингра, кире пуканĕ йăтса, хĕллехи спорт сезонне уçнă ятпа йĕлтĕрпе чупса тупăшмалла пулĕ. Çавăн пекех ачасем Совет Союзĕн Геройĕн Ф.Черновăн призне çĕнсе илессишĕн Асанкассинче, СССР чемпионкин З.Ефремован призĕсемшĕн Анат Тимĕрчкассинче ирĕклĕ майпа кĕрешсе вăй виçĕç. Спартакиадăна шкул ачисем хастар хутшăнасса, çĕнтерÿшĕн çине тăрса тупăшасса шанас килет.
Источник: "Каçал Ен"