25 октября 2008 г.
Сергей Викторович Зайцев — пирĕн обществăн хастар членĕ. С.Зайцев Çĕнĕ Сĕнтĕр ялĕнче, нумай ачаллă çемьере çуралса ÿснĕ. Чи кĕçĕнни пулнă вăл. Малтанах ялти шкула, унтан Комсомольски вăтам шкулне пĕтерет. 18 çулти каччă çар ретне тăрать. Унтан таврăнсан Альметьевск хулинчи физкультура техникумне вĕренме кĕрет. Физкультура учителĕн специальноçне алла илет.
1960 çулта Сергей Викторович ялти хĕрпе, Валентинăпа, çемье çавăрать. Зайцевсем пĕр-пĕринпе килĕштерсе пурăнаççĕ. Пилĕк ача çитĕнтерсе пурнăç çулĕ çине тăратнă. Пурне те аслă пĕлÿ илме пулăшнă. Аслă ывăлĕ, Саша, çемйипе Мускавра тĕпленнĕ. Наташа Чулхула облаçĕнче пурăнать. Юрийпе Рина аслă пĕлÿллĕ, Мускавра ĕçлеççĕ. Алена, шел пулин те, вăхăтсăр çĕре кĕнĕ. Вăл, ашшĕ пекех, спортпа туслă пулнă. Нумай ăмăртăва хутшăнса чемпион ятне çĕнсе илнĕ.
Сергей Викторовичпа Валентина Тимофеевна ывăлĕ-хĕрĕсемпе мухтанаççĕ. Вĕсене яланах пулăшма тăрăшаççĕ. Пурте пĕрле пухăнсан чунтан савăнса чылайччен калаçса лараççĕ. Зайцевсем килте иккĕшĕ çеç. Пур ĕçе те шăкăл-шăкăл калаçса пĕрле пурнăçлаççĕ. Кил-çурчĕ, хушма хуçалăхĕ те çирĕп вĕсен. Тĕрлĕ пахча-çимĕç çитĕнтереççĕ. Выльăх-чĕрлĕх усраççĕ, кайăк-кĕшĕк тытаççĕ, ÿркенмеççĕ. Ял-йыш та чунтан хисеплет вĕсене.
Сергей Викторович паянхи кун та спортпа туслă. Ăмăртусене хаваспах хутшăнать. Тĕслĕхрен, Сергей Викторович 1983 çултанпах куç курманнисен обществи йĕркелекен шашка вăййисенче хастарлăхпа палăрать. Яланах вăл малти вырăнта. Акă, сентябрьте иртнĕ тупăшуран та çĕнтерÿпе таврăнчĕ. Шашкăлла выляма уйрăмах кăмăллать вăл. Çавăнпах район, республика шайĕнче йĕркелекен ăмăртусене яланах хутшăнать. Пĕрре мар чемпион ятне тивĕçнĕ.
Сергей Викторович районти куç курманнисен обществин кашни канашлăвнех хутшăнать. Ыттисен пурнăçĕпе интересленет. Пурне те пулăшма тăрăшать.
Источник: "Каçал Ен"