25 октября 2008 г.
Районăн 70 çулхи юбилейне халалланă смотр-конкурса ку эрнере Комсомольски 1-мĕш вăтам шкулĕн коллективĕ малалла тăсрĕ. Пилĕк çул каялла, районăн 65 çулне паллă тунă чухне, ял поселенийĕсен художество пултарулăх ушкăнĕсем çеç сцена çине тухнăччĕ. Халь конкурса хутшăнакансен йышне пысăк шкулсене, учреждени-организаци коллективĕсене те кĕртни питĕ аван пулăм. Куракансем кĕркуннехи-хĕллехи вăрăм каçсене культурăллă канса ирттерĕç. Вырăнти артистсем вара хăйсен талантне çынсем умĕнче кăтартма пултарĕç.
Концерт программине пуян та тĕрлĕ енлĕ йĕркеленĕ. Унта юрă-ташă та, кулăшпа шÿт те кĕртнĕ. Учительсем, вĕренекенсем сцена çинче пĕр-пĕрне улăштарса кăна тăчĕç. Надежда Воробьевăпа Андрей Мамуткин конферансьесем питĕ килĕшÿллĕ ертсе пычĕç, куракансене тунсăхлама памарĕç. Пирваях учительсен хорĕ чăваш, вырăс юррисене янраттарчĕ. Ирина Саванина «Не забывайте друзей» юрăпа чуна хускатрĕ. 1-мĕш вăтам шкулта пултаруллă ачасем йышлă. Пĕртăван Наташăпа Инесса Михайловасем, Елена Сизовăпа Карина Долгова, хĕрачасен ушкăнĕ юрлама ăста. Татьяна Иванова ертсе пыракан «Островок» ансамбль çăмăл та хитре ташăсемпе савăнтарчĕ. Анна Титова вĕренекен вара ывăлне «вĕри точкăра» çухатнă амăшĕн «Мое солнышко» монологне чуна пырса тивмелле вуласа нумайăшĕн куçĕнчен куççуль кăларчĕ. Ваня Долгов «Мечты ученика» сценкăра хăйĕн ыйтăвĕсемпе учительсене йывăр лару-тăрăва кĕртсе ÿкерчĕ.
Çын юрласан чунĕ юрлать, чун юрласан вара пурăнас, ĕçлес килет. Учительсен уроксенче кашни кунах артист пулма тивет, çавăнпа сцена çинче те хăйсене шыври пулă пекех туйрĕç вĕсем. «Ах, аннеçĕм, анне» юрра шкул директорĕ Анатолий Терентьев шăрантарни пурин кăмăлне те кайрĕ. Арçынсен квартечĕ, хĕрарăмсен ушкăнĕ те çĕкленÿллĕ юрларĕç.
Хальхи компьютер техникипе тем тума та пулать. Концертри юрăсене слайдсемпе илемлетни питĕ лайăх, паллах. Анчах «Концерт, посвященный к 70-летию образования Комсомольского района» тесе çырнинче йăнăш яни шкул коллективне пĕрре те илем кÿрекен япала мар.
Концерт программине «Песня о доброте» юрăпа вĕçлерĕç. Çак номер уйрăмах аван пулса тухнă. Пĕтĕм коллектив сцена çинче юрланă май залра ачасем, пирĕн пурнăç чечекĕсем, вальс çаврăнчĕç.
Источник: "Каçал Ен"