22 октября 2008 г.
Октябрĕн 16-мĕшĕнче районăн 70 çулхи юбилейне халалланă смотр-конкурс пуçланчĕ. Вăл килес çулхи майăн 7-мĕшĕнче вĕçленет. «Комсомольское» культурăпа кану центрĕн сцени çине çак тапхăрта предприятисемпе организацисен ĕç коллективĕсем, ял поселенийĕсен художество пултарулăх ушкăнĕсем тухĕç.
Смотр-конкурса уçма районти тĕп больница коллективĕ тивĕçнĕ. Çапла туни тĕрĕсех те пуль, ара, вăл районăн тантăшĕ. Больницăна уçнăранпа та кăçал 70 çул çитрĕ-çке. Концерт пуçланиччен куракансем умĕнче район пуçлăхĕ Геннадий Волков сăмах илчĕ. Пурне те çывхарса килекен юбилей ячĕпе саламларĕ, ăнăçу, тăнăç пурнăç сунчĕ. «Каçал» халăх фольклор ансамблĕн артисчĕсем хăйсен юрри-ташшипе савăк кăмăл кÿчĕç.
Концерт программи питĕ пуян та тĕрлĕ енлĕ пулчĕ. Пирĕн медицина ĕçченĕсем вара сцена çине тухсан артистран пĕрре те кая мар иккен. Юрра-ташша та ăста, шÿтлесе ăш хытиччен култарма та пултараççĕ. Курма килнисем вĕсен кашни номерне ăшшăн йышăнчĕç. Уйрăмах Людмила Симендеева, Светлана Шакмакова, Татьяна Миговорова, Римма Краснова илемлĕ те уçă сассисемпе пурне те тыткăна илчĕç. Çĕнĕ Мăратри пĕтĕмĕшле практика врачĕн уйрăмĕнче ĕçлекенсем «Юх, юх, юханшыв», «Çĕмĕртĕм» юрăсене илемлĕ янраттарчĕç. Арçынсен хорĕ патриотла юрăсене хăватлăн юрлани те кăмăла кайрĕ.
Октябрĕн 23-мĕшĕнче Комсомольски 1-мĕш вăтам шкулĕн коллективĕ смотр-конкурса малалла тăсать.
Источник: "Каçал Ен"