22 октября 2008 г.
Район прокуратурипе Чăваш Республикин Роспотребнадзор управленийĕн Патăрьел районĕнчи территори уйрăмĕ тĕрĕслев ирттерчĕ. Вĕсем тĕрлĕ кафесемпе столовăйсенчи санитарипе эпидемиологи нормисене пăхăннине тĕрĕслерĕç. Кун пек рейдсем час-часах иртеççĕ пулин те, хуçасем асăрхаттарнине хăлхана чикмеççĕ. Çаплах ĕçлеççĕ. Тĕслĕхрен, район администрацийĕн çуртĕнче вырнаçнă “Галион” кафере санитарипе эпидемиологи йĕркине сĕмсĕррĕн пăсаççĕ. Апат çимелли пÿлĕмре мачча хуралсах ларнă, ывăссемпе çĕçĕсем çинче ятарлă маркировка паллине лартман. Выльăх-чĕрлĕх ашĕпе ветеринари свидетельстви илмесĕрех, тĕрĕслеттермесĕрех апат-çимĕç хатĕрлеме усă кураççĕ. Кашăк-тирĕксене дезинфикцилемеççĕ. Ытти кăлтăксем те пур.
Çавăн пекех “Афун”, “Оазис” кафесене те тĕрĕсленĕ.
Хăш-пĕр кафесенче срокран тухнă таварсене сутнине тĕл пулатăн. Ку вара çыннăн организмĕшĕн хăрушă пулнине пĕлмеççĕ те тейĕн вĕсем.
Тĕрĕслев ирттернĕ май яваплă çынсем тĕлĕшпе административлă правăна пăснипе производствăлла ĕç пуçарнă.
Источник: "Каçал Ен"