15 октября 2008 г.
Октябрĕн 12-мĕшĕнче АПШри Чикаго хулинче тĕнче шайĕнчи марафон иртнĕ. Унта Чăваш Ен спортсменĕсем Лидия Григорьевăпа Алевтина Биктимирова хутшăннă. Финиша чи лайăх вăхăтпа, 2:27:19, Лидия пĕрремĕш çитнĕ. Алевтина та унран нумай юлман, юлташĕ хыççăнах 2:29:32 вăхăтпа, дистанцие вĕçленĕ. Икĕ чăваш хĕрĕ Япони спортсменкине Киока Симахарăна виççĕмĕш вырăна хăварнă. Раççей командинчи арçынсенчен вара çĕнтерÿçĕсен йышне никам та лекеймен.
Ентешĕмĕре, Виçпÿрт хĕрне, черетлĕ çитĕнÿ ячĕпе чĕререн саламлатпăр. Алевтинăн ашшĕ-амăшĕ тата тăванĕсем çакăн пек маттур хĕрпе чăннипех мăнаçланма пултараççĕ.
Источник: "Каçал Ен"