27 сентября 2008 г.
Октябрĕн 1-мĕшĕ — Ваттисен кунĕ. Çак уява çÿллĕ шайра ирттерес тĕлĕшпе, ватăсен пурнăçĕпе паллашас тесе сентябрĕн 24-мĕшĕнче район администрацийĕн ларусем ирттермелли залĕнче черетлĕ канашлу пулчĕ. Кунта ялсенчи ветерансен совечĕсен председателĕсем, ваттисен çурчĕсен ертÿçисем, ытти специалистсем пухăнчĕç. Канашлăва районти ветерансен совечĕн председателĕ Ю.С.Тимофеев уçрĕ.
Социаллă пулăшу паракан центр директорĕ Т.Смирнова ватăсем пулăшăва тивĕçлине тĕслĕхсемпе çирĕплетсе пачĕ. Ваттисем пурăнакан çуртсен ĕçĕ-хĕлĕпе ытларах паллаштарчĕ. Паянхи куна районти виçĕ ялта ваттисен çурчĕсем ĕçлеççĕ. Ватлăхра пĕччен юлнă çынсем Çĕнĕ Мăратри, Хирти Мăнтăрти, Шурутри ваттисен çурчĕсенче хăтлăх тупнă. Вĕсенче пурĕ 24 çын пурăнать. Кунта пур услови те çителĕклĕ: ăшă, хăтлă, мунча пур, кунне 3 хутчен апат çитереççĕ. Телевизор курма пулать, хаçат-журнал çырăнса илеççĕ. Тĕрлĕ мероприятисем те йĕркелеççĕ. Ватăсем унти пурнăçпа кăмăллă, ÿпкелешмеççĕ.
Ваттисен çурчĕсен ертÿçисем те сăмах илчĕç. Хăйсен ĕçĕ-хĕлĕпе паллаштарчĕç. Район пуçлăхĕ Г.Волков, РФ Пенси фончĕн Комсомольски районĕнчи управленийĕн начальникĕн çумĕ И.Белобаева та тухса калаçрĕç, ветерансен ыйтăвĕсем çине хуравларĕç. Ватăсене пăшăрхантараканни чылай. Çамрăк ăру тивĕçлĕ воспитанисĕр ÿсни те канăçсăрлантарать, ăçта килнĕ унта çÿп-çап выртни те вырăнсăр...
Ватăсем пĕрле пухăнса калаçма май пулнишĕн, хăйсене хисепленишĕн те савăнаççĕ. Нумай ыйтăва пăхса тухрĕç вĕсем, кирлĕ йышăнусем турĕç. Кашни организаципе предприятире йĕркелеме палăртнă уявсене графикпа килĕшÿллĕн ирттерме йышăнчĕç.
Источник: "Каçал Ен"