24 сентября 2008 г.
Район больницин тулли историйĕпе хаçатра паллаштарнăччĕ. Аса илмелли чăнах та нумай. Истори пуян пулни те паха. Акă, кăçал район больници 70 çул тултарнине халалласа чылай мероприяти ирттерчĕç. Уяв тĕлне çеç мар, ахаль чухне те вĕсем пур мероприятие те хастар хутшăнаççĕ. Юбилей тĕлне больницăра музей уçни чăннипех те паллă самантсенчен пĕри. Музей хăйĕн пĕрремĕш утăмне турĕ...
Кунта информаципе пуян стендсем пур. Акă, тĕслĕхрен, чи сумлисенчен пуçлам. Раççей Федерацийĕн, Чăваш Республикин правительствин наградисене тивĕçнĕ пултаруллă, хăйĕн ĕçне чунтан парăннă тухтăрсене асăнас килет. М.И.Федорова, В.В.Орлова, В.В.Лаврова, Т.В.Буслаева, В.А.Тимофеева, В.В.Максимов, В.А.Арсентьева, А.С.Тихонова, С.А.Мельдина, Л.Н.Симендеева, Т.С.Тимергалиева, Н.А.Филиппова, Л.С.Сумзина, М.М.Самукова, М.С.Колесниченко, Н.И.Кольцова, А.Г.Скворцова, Р.С.Краснова, Е.И.Ананьева, Н.М.Минетуллина ĕçри ÿсĕмсемшĕн Хисеп грамотисене, тĕрлĕ наградăсене тивĕçнĕ. Канăва усăллă та пахалăхлă ирттернине сăнлакан ÿкерчĕксемпе та паллашма кăмăллă. Кунта тĕрлĕ спорт мероприятийĕсене хутшăнса мала тухнă самантсем, ăмăрту вăхăчĕсем куç умĕнчех. Аса илмелли те пайтах. Район больници 70 çул хушшинче епле улшăнса çĕнелнипе паллашас тесен “Район больници: ĕнер, паян тата ыран” стенд пулăшĕ. Кунта Аслă Отечественнăй вăрçă ветеранĕсен, фельдшерсемпе санитаркăсен сăн ÿкерчĕкĕсем те пур. Вĕсем пурнăçне шеллемесĕр салтакасене пулăшу панă. Ĕçĕ йывăр та тертлĕ пулнă. Тав сăмахне тивĕç вĕсем. Район больницинче чылай çул ырми-канми тăрăшса тивĕçлĕ канăва кайнă тухтăрсемпе, медсестрасен сăн ÿкерчĕкĕсем те сумлă вырăнта. Район кунта çуралса ÿснĕ, халĕ çĕр шывăн тĕрлĕ кĕтесĕсенче ĕçлесе пурăнакан ентешсемпе те мухтанать. Акă тĕслĕхрен, С.П.Лукьянова, В.А.Галкин, П.С.Васильев, Н.А.Григорьева, Т.Е.Клементьева, Н.Ф.Алексан-дрова, А.Н.Степанов, Т.А.Лаврова, Г.Л.Драндров, В.Н.Уральская, А.А.Назарова, И.А.Симендеева, О.Н.Владимирова, О.В.Максимов, В.С.Буслаева, М.М.Ямалетдинов, К.М.Гильфанова, П.А. Владимирова, Р.Э.Ибрагимов тухтăрсемпе медсестрасем урăх хуласемпе районсенче чирлисене тивĕçлĕ пулăшу параççĕ.
Кунтах тĕрлĕ ÿсĕмсене чысланă Хисеп хучĕсемпе грамотăсем, Мухтав хучĕсем. Тĕслĕхрен, 1999 çулта район больници “Чи лайăх больница” ята тивĕçнĕ. Спортри çитĕнÿсемшĕн тивĕçнĕ кубоксем те пур. Спорта юратакансем район, республика шайĕнче йĕркелекен пур ăмăртăва та хутшăнаççĕ, малти вырăнсене çĕнсе илеççĕ.
Медицинăра усă куракан хăш-пĕр япаласем, инструментсем те упранаççĕ музейра. Больницăри пур уйрăмри ĕç-хĕлпе, унти ĕçченсемпе ятарласа хатĕрленĕ альбомсенчен паллашма пулать. Çавăн пекех акушерпа фельдшер пункчĕсем, пĕтĕмĕшле практика врачĕн уйрăмĕсем те айккинче юлман.
Медицина литературипе те пуян музей. Çакăн чухлĕ информаци тупма çăмăлах пулман. Кунта, паллах, пурте тăрăшса ĕçленĕ. Уйрăмах вара Л.П.Варламова, М.И.Федорова ĕçĕ курăмлă тесе калас килет.
“Пĕрремĕш утăма тума çăмăлах пулмарĕ. Апла пулин те ĕмĕтленни пурнăçланчĕ. Музее пуянлатсах пырăпăр”,— тет Маргарита Ивановна Федорова.
Музей уçăлни тĕп больницăшăн пысăк утăмсенчен пĕри. Унăн кун-çулĕ вăрăм та пĕр тикĕс пуласса шанас килет.
Источник: "Каçал Ен"