06 сентября 2008 г.
Çак кунсенче чăваш халăхĕшĕн паллă кунсем тесех калас килет. Республикăра Чăваш Ен хисеплĕ гражданинне, Совет Союзĕн икĕ хут Геройне, летчик-космонавта Андриян Григорьевич Николаева халалласа чылай мероприяти ирттереççĕ. Чăваш халăхĕ хăйĕн мухтавлă ывăлне манмасть, малашнехи ăрусем те унпа мăнаçланĕç.
Сентябрĕн 3-мĕшĕнчех республикăшăн паллă самант пуçланнă. Чаплă летчик-космонавт çуралса ÿснĕ Шуршăл ялĕнче, унти мемориаллă комплексра В.Глушко 100 çул тултарнине халалласа выставка уçнă. Ун ятне вулакансем пĕлсех те каймаççĕ пулĕ. Вăл çĕршыври реактивлă двигательсем тăвакан шкула пуçарса янă, хăй вăхăтĕнче легендарлă академик пулнă. Глушко ятне чаплă çыннăмăр, С.Королев академик шайне лартма пулать.
Сентябрĕн 4-мĕшĕнче мухтавлă космонавта А.Г.Николаева асăнса çулсеренех иртекен чупăва хутшăнакансем старт илнĕ. Кăçалхипе вăл пиллĕкмĕш хут иртет. Пилĕк маршрутпа спорта юратакансем, çамрăк çăмăл атлетсем пĕтĕм республикипех чупса, хамăр ентешпе мăнаçланнине кăтартнă.
Шăмăршă — Патăрьел, Комсомольски — Канаш — Çĕрпÿ — Туçи ялĕ — Шăмăршă маршрутпа чупу иртрĕ. Пирĕн район 2-мĕш маршрута кĕрет. Сентябрĕн 4-мĕшĕнче районти спорта юратакансем, шкул ачисем патăрьелсенчен эстафета патаккине илчĕç. Икĕ район чиккинче Андриян Николаев ячĕпе ăшă сăмахсем пулчĕç. Кунта Шупашкар хула представителĕ, чупу ертÿçи А.О.Андреев, Патăрьел район пуçлăхĕн çумĕ Р.В.Селиванов, Комсомольски район администрацийĕн физкультура енĕпе ĕçлекен специалисчĕ Е.А.Тихонов сăмах илчĕç. Патăрьел тата Комсомольски артисчĕсем савăк юрă шăрантарчĕç. Унтан вара Кĕçĕн Çĕрпÿел вăтам шкулĕн ачисем çула тухрĕç. Хирти Явăш, Хирти Мăнтăр, Нĕркеç вăтам шкулĕсенче пĕлÿ пухакансем ылмашăна-ылмашăна район центрне çити чупса çитрĕç. Стартра пĕр канмасăр чупакан вĕренекенсем те пулчĕç. Маттур. Тен, хăшĕ-пĕри чаплă спортсмен та пулĕ.
Сентябрĕн 5-мĕшĕнче чупăва малалла тăсса Комсомольски 1-мĕш, Урмаел вăтам шку-лĕсенчи спортсменсем Канаш районĕн чиккине çити чупса эстафетăна кÿршĕсене пачĕç. Хăнасене çăкăр-тăварпа кĕтсе илсе, савăк юрăпа саламларĕç.
Маршрут çине ГИБДД сотрудникĕсем, медицина ĕçченĕсем те тухрĕç.
Чупу шăматкун 14.00 сехетре Шуршăлти А.Г.Николаев космонавтăн çурт-музейĕ çывăхĕнче вĕçленет.
Источник: "Каçал Ен"