03 сентября 2008 г.
Сентябрĕн 1-мĕшĕнче районти шкул ачисене партăсем хушшине йыхравласа, çĕнĕ вĕренÿ çулĕ пуçланнине пĕлтерсе пĕрремĕш шăнкăрав янăрарĕ. Çу кунĕсенче каннă, сывлăха çирĕплетнĕ, тĕрлĕ производствăра ĕçленĕ 3 пин ытла ача çĕнĕ вăй-хăватпа пĕлÿ тĕнчине кĕчĕç. 318 ача пĕрремĕш хутчен парта хушшине ларчĕ. «Вĕрентÿ» наци проекчĕпе килĕшÿллĕн патшалăх ачасене вĕренме кирлĕ условисене лайăхлатас, пĕлÿ парассин пахалăхне аванлатас тесе çине тăрать. Шкулсем çĕнĕ оборудованипе, сĕтел-пуканпа, вĕрентÿ хатĕрĕсемпе пуянланаççĕ. Апла пулсан ачасене пĕлÿ илме пур условисем те çителĕклĕ, хăйсен тăрăшулăхĕ çеç кирлĕ.
ТĂМАНЛĂ ВЫÇЛИ. Савăнăçлă линейкăна вăтам шкул директорĕ Ю.Н.Емельянов уçнă. Ачасене вĕренÿ çулĕ пуçланнă ятпа саламланă. Шкулта кашни çулах «Чи лайăх класс» конкурс ирттереççĕ. Çĕнтерÿçĕсене палăртнă чухне тĕрлĕ енчен хак параççĕ. Юрий Николаевич çĕнтерÿçĕсене 23 номинаципе палăртса Хисеп грамотисем, парнесем панă. Ачасем малашне те вĕренÿре, спортра, обществăлла ĕçсенче хастар пуласса шаннине пĕлтернĕ.
Районти вĕрентÿ пайĕн представителĕ В.И.Кириллов тăманлăвыçлисем пĕрлехи патшалăх экзаменĕсене ăнăçлă тытнине палăртнă, республикăри «Орленок» тата «Зарница» вăййисенче 2-мĕш вырăн йышăнса интерактивлă комплекс çĕнсе илни вĕренÿре чылай пулăшу пама пултарнине çирĕплетсе каланă.
Шкул ачисем çу кунĕсенче алă усса ларман. «Пайгас» ял хуçалăх кооперативĕнче, «Тăманлă Выçлири кирпĕч завочĕ» акционер обществинче тăрăшнă. Вĕсен представителĕсем те пушă алăпа килмен. Пĕрлешÿллĕ хуçалăх правленийĕ ячĕпе Р.Н.Потапова хастар ĕçленĕ ачасене тав тунă, укçан преми панă, Шупашкара экскурсине кайса килнине пĕлтернĕ. Кирпĕч завочĕн дирекцийĕ 8 ачана уйăхсерен стипенди тÿлесе тăма йышăннине Н.А.Бархонова каласа панă. Унта ĕçленисем Хусана экскурсине те кайса килнĕ. Тукай ял поселенийĕн пуçлăхĕ П.А.Муллин та салам сăмахĕсемпе тухса калаçнă. Кăçал пĕрремĕш класа 9 ача килнĕ. Вĕсем аппăшĕсемпе тетĕшĕсене салам сăмахĕсем каланă, юрă-сăвă парнеленĕ. Вунпĕрмĕшсем те парăмра юлман. Кăçалхи вĕренÿ çулĕнче 14 ача шкулпа сывпуллашĕ.
Пĕрремĕш класа килнĕ Ирина Алексеевапа вунпĕрмĕшĕнче вĕренекен Сергей Перьев пĕрремĕш шăнкăрав шăнкăртаттарнă.
Ачасемшĕн хĕрÿ тапхăр пуçланчĕ, ăнăçу вĕсене.
Источник: "Каçал Ен"