27 августа 2008 г.
Кашни халăх тумĕнче хăйне евĕрлĕ илем, ăсталăх упранать. Халăха хăйĕн йăли-йĕркипе, культурипе татах та вăйлăрах çывăхлатас тĕллевпе районти “Çĕр тата çынсем” халăх музейĕ наци тумĕллĕ пуканесен конкурсне йĕркелет. Конкурс çурла уйăхĕн
1-мĕшĕпе авăнăн 1-мĕшĕччен пырать. Конкурса коллективсем, уйрăм ăстасем хутшăнма пултараççĕ.
Ĕçсемпе “Çĕр тата çынсем” музейра йĕркеленĕ куравра паллашма пулать. Çурла уйăхĕн 25-мĕшĕнче курав уçăлнă. Вăл авăнăн 15-мĕшĕччен ĕçлĕ. Конкурса тăратнă ĕçсене тĕп критерипе хаклаççĕ. Кунта халăх тумĕ урлă унăн йăли-йĕркипе, ĕçĕ-хĕлĕпе паллаштарассине тĕпе хураççĕ.
Курав залне кĕрсессĕн пачах та урăх тĕнчене лекнĕн туйăнать. Çак тăрăхра пурăнакансен ( чăваш, тутар, вырăс) ÿнер, илем тĕнчипе паллашас текенсене музее çитсе курма сĕнесшĕн.
Источник: "Каçал Ен"