27 августа 2008 г.
Уяр çанталăкпа усă курса районти ял хуçалăх предприятийĕсем акнă тырпула пуçтарса кĕртессине вĕçлесе пыраççĕ. Пĕрчĕллĕ тата пăрçа йышши тырăсене пурĕ 13635 гектар çинче пăхса çитĕнтернĕ пулсан, 10897 гектарне çапса тĕшĕленĕ. Районĕпе мĕн акнин 80 процентне пуçтарса илнĕ. «Дубрава», «Заря», «Турхан» ял хуçалăх кооперативĕсенче, «Слава картофелю» агрофирмăра, «Родина», «Золотой колос» ОООсенче, Минатуллинăн, Атласкинăн, Семеновăн, «Кызыл сабанча» фермер хуçалăхĕсенче вырма ĕçĕсем вĕçленнĕ. «Слава», «Искра», «Труд», «Восток», «Асаново», «Алга», «Урожай», «Победа», «Правда», «Рассвет» хуçалăхсенче те пуçтарса илмелли нумаях юлман.
Йĕтемсем çине 27959 тонна тырă кĕнĕ. Хальлĕхе кашни гектар пуçне 25,7 центнер тырă тухать. Уйрăмах тухăç «Слава картофелю» агрофирмăра (44,1 центнер) пысăк. «Нива» агрофирма, «Урожай» колхоз, «Золотой колос» ООО, «Кызыл сабанча», Семеновăн фермер хуçалăхĕсем кашни гектартан 30 ытла, «Луч», «Заря», «Пайгас», «Рассвет» ял хуçалăх кооперативĕсенче, Минатуллинăн фермер хуçалăхĕнче тухăç 30 центнера яхăн пулнă.
Районĕпе 6652 гектар çинчен улăм пуçтарса илнĕ, урана хывнă, тюкласа кĕртнĕ, халăха валеçсе панă. «Луч», «Урожай», «Рассвет» хуçалăхсенче «Слава картофелю», «Нива» агрофирмăсенчи, «Золотой колос» ОООри, Минатуллинăн, Атласкинăн, Семеновăн фермер хуçалăхĕсенчи хирсенче улăм юлман.
Кĕр тыррисем акма районĕпе 3242 гектар çĕр хатĕрленĕ. Ку енĕпе «Труд» (265 гектар), «Восток» (250 гектар) хуçалăхсем ăнăçлă ĕçлеççĕ. «Победа», «Дружба» ял хуçалăх кооперативĕсен, «Урожай» колхозăн, Минатуллин фермер хуçалăхĕн те 200 ытла гектар хатĕр çĕр пур.
Районĕпе 376 гектар çине кĕр тыррисем акнă. Çак ĕç 6 хуçалăхра пырать. «Победа» (120 гектар), «Дубрава» (90 гектар), «Труд» (60 гектар), «Восток» (50 гектар), «Урожай» (45 гектар), «Кызыл сабанча» (11 гектар) кĕрхи тулăпа ыраш вăрлăхне çĕр айне хывса хăварнă.
Çĕртме тăвасси те малалла пырать. Августăн 25-мĕшĕ тĕлне районĕпе 1387 гектар сухаланă. Ку енĕпе «Слава картофелю», «Нива» агрофирмăсем, «Труд» ял хуçалăх кооперативĕ лайăх ĕçлеççĕ.
Ял хуçалăх предприятийĕсем пурĕ 1535 тонна тырă сутнă. 5 хуçалăхра çĕрулми кăларнă. Çак ĕçе 92 гектар çинче пурнăçланă. Пуринчен ытларах «Слава картофелю» агрофирма «иккĕмĕш çăкăра» ытларах сутнă. Унта тухăç та пысăкрах.
Вырма пынă вăхăтрах выльăх апачĕ хатĕрлесси те чарăнса лармасть. Районĕпе 7937 тонна утă хатĕрленĕ. Ку енĕпе «Слава» ял хуçалăх кооперативĕ (1100 тонна) палăрса тăрать. «Урожай» колхозăн 972 тонна, «Труд», «Асаново» ял хуçалăх кооперативĕсен 693—548 тонна паха утă пур. Сенаж районĕпе 30557 тонна янтăланă. Ку тĕлĕшпе «Восток» (3850 тонна), «Урожай» (3786 тонна), «Асаново» (3040 тонна) хуçалăхсем палăрса тăраççĕ.
Кĕçех «иккĕмĕш çăкăр» пуçтарма вăхăт çитет. Вăл вăхăтра вырмана ирттерме панă пек лайăх çанталăк çеç тăтăрччĕ.
Источник: "Каçал Ен"