23 августа 2008 г.
Ял хуçалăх предприятийĕсенче халĕ хĕрÿ вăхăт. Ĕçченсем мĕн акса-лартса тунине пуçтарса кĕртеççĕ. Вĕсене ĕçлеме хавхалантарас тĕлĕшпе культура ĕçченĕсем те хире тухнă. Александровка ял поселенийĕнчи культурăра тăрăшакансем çĕр ĕçченĕсене манса каймаççĕ. Кăçал та савăк юрă-кĕвĕпе, илемлĕ ташăсемпе хирте ĕçлекенсем патне 6 хутчен çитнĕ. Концерт программи интереслĕ. Ĕçченсем Е.Костякова, М.Шамбина, А.Кокшина шăрантарнă «Сад пахчинче», «Çил тăманĕ» юрăсене алă çупса кĕтсе илчĕç. В.Поповапа Н.Ванюркина куракансене «Кулянатăп» юрă парнелерĕç. Валерий Ванюркинпа Александр Тарасов юрланă «Çăлкуç» юрăпа пурте кăмăллă юлчĕç. Н.Ванюркина юрăра пирĕншĕн чи çывăх çыннăмăр пирки сăмах хускатнă. «Анне» юрă кашни çыннăн чунне тыткăнларĕ. В.Светличная вара куракансене шÿтсемпе, анекдотсемпе хаваслăх кÿчĕ.
Концерт программине культура ĕçченĕ Е.Александрова ертсе пычĕ. Агитбригада коллективĕ каярахпа Çĕнĕ Сĕнтĕр, Кивĕ Сĕнтĕр, Хырай Ĕнел тата Александровка ялĕсенчи ĕçченсене савăнтарнă, хавхаану кÿнĕ. Кунпа çеç лăпланасшăн мар-ха вĕсем. Йăлмахва тăрăхне те çула тухасшăн. тар кăларса ĕçлекенсене хавхалантармалла, вăй-хал сунмалла.
Пирĕн районти культура ĕçченĕсем çулсеренех уй-хирте ĕçлекенсем патне тухаççĕ. Çакă йăлана кĕнĕ ĕнтĕ. Кăçал Кĕçĕн Çĕрпÿел, Эльпуç, Комсомольски, Тукай, Хирти Сĕнтĕр ял поселенийĕсенчи художествăлла пултарулăх коллективĕсем йĕтемсем çинче пулнă, хире тухса унта ĕçлекенсене савăнтарнă. Çанталăк шăрăх тăрать, çĕр çыннин ĕçĕ йывăр. Кун пек чухне вĕсен ĕçне ăнланни, юрă-ташăпа та пулăшма тăрăшни паха.
Источник: "Каçал Ен"