23 августа 2008 г.
Пушар хуралĕнче вăй хуракансен çаврăнăçулăхне, вăйне пурнăç тĕрĕслесех тăрать. Унта та кунта тухакан вут-кăварпа çирĕп вăй-халлă, нимле лару-тăрура та çухалса кайманнисем çеç кĕрешме пултараççĕ. Вĕсен çак енĕсене тĕрĕслес тесе республикăри Чрезвычайлă лару-тăру министерствин пушара хирĕç кĕрешекен управленийĕ час-часах тĕрлĕ ăмăртусем ирттерет. Кăçал çуркунне 31-мĕш пушар чаçĕн ĕçченĕсем кăнтăр зонăри тупăшусенче çĕнтерсе финала тухнăччĕ. Иртнĕ эрне вĕçĕнче вара зонăсенчи çĕнтерÿçĕсем Канаш хулинче пуçтарăннă. Пирĕн район чысне А.Жуков, А.Жирнов, Ю.Иванов, М.Дряблов, И.Порфирьев, Г.Крылов, А.Антонов тата А.Прохоров хÿтĕленĕ. Вĕсене ăмăртусене хатĕрлекенĕ 31-мĕш пушар чаçĕн начальникĕ С.А. Алексеев пулнă.
Тупăшусем тĕрлĕ енлĕ тата хĕрÿ иртнĕ. Тăсăлакан чикмекпе виççĕмĕш хута хăпарассипе пирĕн команда иккĕмĕш пулнă. 100 метра чăрмавсем урлă чупса Андрей Жуков финиша виççĕмĕш çитнĕ. Чи кăткăс тупăшу — пушар машинипе шыв ĕмтерсе илсе рукавсене тăсса ятарлă савăта шыв тултарасси. Кунта комсомольскисене çитекен пулман. Çакна пирĕн Юрий Иванов пек вăр-вар та хăвăрт пурнăçлама вĕренмелле-ха!
Ăмăртусен пĕтĕмлетĕвĕсемпе Комсомольскинчи 31-мĕш пушар чаçĕ пĕрремĕш вырăна тухнă. Тăвайсемпе çĕрпÿсем иккĕмĕшпе виççĕмĕш вырăнсене пайланă. Асăннă çĕнтерÿре командăри çеç мар, коллективри кашни çыннăн тÿпиех пур, мĕншĕн тесен ăмăртусене каякансене ыттисем пĕр сăмахсăрах улăштараççĕ. Паллах, туслă йышра ĕç те ăнса пырать, спортра та çитĕнÿсем пулаççĕ. Уйрăмах начальник çумне Андрей Жукова, Юрий Ивановпа Герман Крылов водительсене палăртас килет. Андрей Николаевич пушар чаçĕнче ĕçлеме пуçлани 15 çул пулсан, çакнашкал ăмăртăва вăл кăçалхипе 14-мĕш хут хутшăннă. Германпа Юрий тата ыттисем те тăван команда чысне хÿтĕлеме яланах хатĕр. Чăн-чăн арçынсене, хÿтĕлевçĕсене урăхла пулма совеçĕ те хушмасть ĕнтĕ.
Источник: "Каçал Ен"