16 августа 2008 г.
Çанталăк уяр тăрать. Районти ял хуçалăх предприятийĕсем унпа туллин усă кураççĕ. Пикенсех пĕрчĕллĕ тата пăрçа йышши тырăсене выраççĕ, курăксене çулса выльăх апачĕ хатĕрлеççĕ.
Августăн 15-мĕшĕ тĕлне тырпула 4097 гектар е пухса илмелли пĕтĕм лаптăкăн 24,4 проценчĕ чухлĕ вырнă. 3560 гектарне çапса тĕшĕленĕ, йĕтемсем çине 9563 тонна тырă кĕнĕ. «Слава», «Искра», «Труд», «Восток», «Алга», «Изамбаево», «Заря», «Победа» ял хуçалăх предприятийĕсем, «Нива», «Слава картофелю» агрофирмăсем, «Дубовка», «Сюрбеево», «Восход», «Родина» ОООсем, Минатуллинăн, Атласкинăн, «Кызыл сабанча» фермер хуçалăхĕсем мĕн çулнине çийĕнчех çапса тĕшĕлесе пынă. Районĕпе вăтам тухăç 26,9 центнерпа танлашать. «Госсорткомиссия» патшалăх учрежденийĕнче, «Пайгас» ял хуçалăх кооперативĕнче, «Урожай» колхозра, Минатуллинăн фермер хуçалăхĕнче мĕн пуçтарса кĕртнинчен гектар пуçне 30 центнер ытла, «Слава картофелю» агрофирмăра 40 центнер ытла тухăç илнĕ.
Уй-хиртен улăма çийĕнчех пуçтарса пыма тăрăшаççĕ. Ăна 1636 гектар çинчен пухса урана хывнă, пресласа кĕртнĕ, халăха валеçсе панă.
Кĕр тыррисем акма та çĕр хатĕрлеççĕ. Вăл ĕçе 2226 гектар çинче пурнăçланă. Ку енĕпе уйрăмах «Труд» (265 гектар), «Урожай» (210 гектар), «Победа» (200 гектар) хуçалăхсем ăнăçлă ĕçлеççĕ.
Хуçалăхсем çĕртме тăвас енĕпе те тăрăшаççĕ. Ку ĕçре уйрăмах «Слава картофелю» агрофирма (120 гектар) хастар. Районĕпе пурĕ 1636 гектар сухаланă, çак ĕç 8 хуçалăхра пырать. Ир пулакан çĕрулмине 22 гектар кăларнă. Ку ĕçе «Слава картофелю» тата «Нива» агрофирмăсем, «Луч» ял хуçалăх кооперативĕ пуçăннă.
Вырма пынă вăхăтрах выльăх апачĕ хатĕрлес ĕç те чарăнса ларман. Районĕпе 7039 тонна утă, 30371 тонна сенаж хатĕрленĕ. Ку енĕпе яланхи пекех «Асаново», «Восток», «Урожай», «Слава», «Искра», «Рассвет», «Заря» хуçалăхсем ăнăçлă ĕçлеççĕ.
Уяр кунсем татах та пулччăр-ха. Тар тăкса çитĕнтернĕ уй-хир культурисене вăхăтра тата пахалăхлă пуçтарса кĕртесчĕ.
Источник: "Каçал Ен"