13 августа 2008 г.
Августăн 9-мĕшĕнче, Физкультурниксен кунĕнче, район центрĕнчи тĕп стадиона халăх чылай пуçтарăннă. Спорта юратакансене, сывă пурнăç йĕркине тытса пыракансене, ял поселенийĕсенчен килнĕ физкультурăпа туслисене район пуçлăхĕ Г.Ф.Волков, район администрацийĕн вĕрентÿ пайĕн физкультурăпа спорт енĕпе ĕçлекен аслă специалисчĕ Е.А.Тихонов саламланă. Ăмăртусем хĕрÿ иртнĕ. Çак кун камăн кая юлас килĕ? Пурте çĕнтерÿшĕн тупăшнă. Хĕрарăмсем хушшинче 100 метра пуринчен лайăхрах кăтартупа Шурут ял поселенийĕнчен килнĕ Светлана Андреева вĕçленĕ. 800 метрлă дистанцире чи пултарулли Хирти Сĕнтĕр ял поселенийĕнчен килнĕ Алина Алексеева пулнă. Арçынсенчен 100 метра Анат Тимĕрчкассинчи Эдуард Иванов чи малтан чупса тухнă. Çак ялти Егор Земсков 1000 метрлă дистанцире пĕрремĕш вырăна алăран вĕçертмен. Тăршшĕне сикессипе те Эдуард Иванов çĕнтернĕ, Света Андреева хĕрсем хушшинче мала тухнă.
Пляж волейболĕ енĕпе те ăмăртусем çивĕч иртнĕ. Кунта Юрий Боровковпа Валерий Лисицын, Даша Юмановăпа Наташа Такмакова (Комсомольски) палăрнă.
Ветерансем хушшинче Кайнлăк ял поселенийĕн пуçлăхĕ Сергей Журавлев 400 метрлă дистанцие чи малтан вĕçленĕ.
Мини-футбол вăййинче Комсомольски 1-мĕш вăтам шкулĕн футболисчĕсем пур командăна та парăнтарса чи мала тухнă.
Районти ОСТО совечĕ винтовкăран персе мала тухассишĕн ăмăртусем ирттернĕ. Кунта ял поселенийĕсен чылай команди хутшăннă.
Физкультурниксен кунĕнче çĕнтерÿçĕсем хаклă парнесене тата Хисеп грамотисене тивĕçнĕ.
Источник: "Каçал Ен"