09 августа 2008 г.
Районта «Комсомольскинчи РСУ» АХО строителĕсен пĕр канăç та çук. Вĕсем район администрацийĕн ларусем ирттермелли залне юсарĕç, халĕ тулаш енчен илемлĕх кĕртес тĕлĕшпе тăрăшаççĕ.
Нĕркеçри культура çуртĕнче те ĕç пырать. Районти тĕп больницăн административлă çур-тĕнче, инфекци уйрăмĕнче юсав ĕçĕсем тăваççĕ. Сантехниксем кивĕ тимĕр шыв пăрăхĕсене пластикран тунисемпе улăштараççĕ.
Асăннă организаци халиччен районта вĕрентÿ, сывлăха сыхлас, культура учрежденийĕсенчи чылай объектра ĕçленĕ. Пĕтĕмĕше практика врачĕн уйрăмĕсем, тĕслĕх библиотекăсем, культура çурчĕсем хăйсен илемĕпе çынсене кăмăла кайнинче асăннă акционер обществин строителĕсен тÿпи пысăк.
Нумаях пулмасть акционерлă общество керамзитпа бетонран блоксем хатĕрлеме пуçланă. «Рифей-05» линие хута яни ĕçе пахалăхлă пурнăçлама май панă. Блоксене халăх хапăлласах туянать.
Источник: "Каçал Ен"