06 августа 2008 г.
Çак кунсенче çунă çумăрсем районти ял хуçалăх предприятийĕсенчи вырма ĕçĕсене чарса тăчĕç. Çапах та августăн 5-мĕшĕ тĕлне пĕрлешÿллĕ хуçалăхсем 1011 гектар пĕрчĕллĕ тата пăрçа йышши тырăсем вырма, 542 гектарне çапса тĕшĕлеме пултарчĕç. Йĕтемсем çине 1626 тонна тырă кĕнĕ, хальлĕхе вăтам тухăç 30 центнерпа танлашать. Пуринчен ытларах «Слава картофелю» агрофирма 88 гектар çинчен, «Слава» ял хуçалăх кооперативĕ 75 гектар, Семеновăн фермер хуçалăхĕ 67 гектар тырă пуçтарса илнĕ.
Районĕпе 6252 тонна утă пур. «Слава» ял хуçалăх кооперативĕ 904 тонна, «Урожай» колхоз 886 тонна утă хатĕрленĕ. Çак ĕç «Труд» (381 тонна), «Асаново» (376 тонна) хуçалăхсенче те аван.
Сенаж хатĕрлес ĕç те малалла пырать. «Восток» (399 тонна), «Асаново» (2978 тонна), «Труд», «Луч» (2800-шер тонна) çак паха апата янтăланă.
Чылай хуçалăх кĕр тыррисем акма çĕр хатĕрлет. Ку ĕçе районĕпе пурĕ 1666 гектар çинче пурнăçланă.
3 хуçалăхра — «Алга», «Правда» ял хуçалăх кооперативĕсенче, Атласкинăн фермер хуçалăхĕнче — улăм пуçтараççĕ.
«Нива» тата «Слава картофелю» агрофирмăсенче, Самаринăн фермер хуçалăхĕнче ир пулакан çĕрулми кăлараççĕ. «Иккĕмĕш çăкăра» 17 гектар çинчен пуçтарса илнĕ. Вăтам тухăç 170 центнерпа танлашать.
Хуçалăхсенче уяр çанталăкра ытти ĕçсем те пыраççĕ.
Источник: "Каçал Ен"