02 августа 2008 г.
Июлĕн 30-мĕшĕнче Комсомольски районĕн санитарипе эпидемиологи комиссийĕн черетлĕ ларăвĕ иртрĕ. Унта пĕртен-пĕр ыйту — Чăваш Республикин Тĕп санитари врачĕн «Приоритетлă наци проекчĕпе Чăваш Енри халăха иммунизацилесси» постановленийĕ епле пурнăçланни пирки пăхса тухрĕç. Асăннă ыйтупа район больницин тĕп врачĕ Маргарита Федорова доклад турĕ. «Сывлăх» наци проектне пурнăçа кĕртсе районти медицина ĕçченĕсем нумай ĕç тăваççĕ. Пĕтĕмĕшле практика врачĕн офисĕсенче халăха В вируслă гепатитран, грипран, хĕрлĕ шатраран, полиомиелитран, ерекен ытти чиртен прививкăсем тăваççĕ. Çавăн пекех профилактика ыйтăвĕсемпе те тимлеççĕ. Çак ĕç кăçал та аван пырать. В вируслă гепатитран 18—35 çулсенчи çынсене, ачасене прививка тăвассине августăн 31-мĕшĕ тĕлне вĕçлемелле. Анчах вакцинăсемпе вăхăтра тивĕçтерменни медиксене чăрмав кÿрет. Маргарита Ивановна палăртнă тăрăх, прививкăсен усси пысăк. Маларахри çулсенче грипп алхасма пуçласан шкулсене вăхăтлăха карантина хупма тивнĕ пулсан, кăçал ун пекки пĕрре те пулман. 2008 çулхи пĕрремĕш çур çулта гриппа чирлекенсен шучĕ, пĕлтĕрхи çак вăхăтрипе танлаштарсан, 4,2 хут чакнă. В вируслă гепатитпа аптранисен шучĕ 100 пин çын пуçне 10,9-тан 3,6-а çити аннă. Çак чир питĕ каварлă, вăл çынна шывран лекме пултарать. Пĕвер ракĕ, циррозĕ пуçланас хăрушлăх пысăк. С вируслă гепатит та хăрушă, вăл ар çыхăнăвĕнчен ерет. Хăвăр сывлăхăра упрас тесен, вакцинацирен пăрăнмалла мар.
Лару ĕçне комисси председателĕ Георгий Киргизов, Чăваш Республикин Роспотребнадзор управленийĕн Патăрьел районĕнчи территори уйрăмĕн ертÿçи Н.М.Сергеева пĕтĕмлетрĕç.
Источник: "Каçал Ен"